Daha bir idmançımız “dopinqə” ilişdi




Beynəlxalq Ağır Atletika Federasiyası Pekin Yay Olimpiya Oyunlarında dopinq testi müsbət nəticə verən daha 3 idmançının adını açıqlayıb.

"Olimpnews.az xəbər verir ki, beynəlxalq federasiyanın rəsmi saytında yerləşdirilən siyahıda Azərbaycan millisinin ağırlıqqaldıranı Sərdar Həsənovun da adı var. Belə ki, Pekin-2008-də 31 yaşlı idmançımızdan götürülən analiz təkrar yoxlamada müsbət nəticə verib. Onun orqanizmində dehidroxlorometiltestosteron aşkarlanıb. Bu səbəbdən də Beynəlxalq Ağır Atletika Federasiyası Həsənovu, həmçinin Tiqran Martirosyan (Ermənistan) və Sibel Ozkanı (Türkiyə) yekun qərar verilənədək bütün yarışlardan kənarlaşdırıb. Əgər dopinqdən istifadə təsdiqlənərsə, onların cəzaları açıqlanacaq.

Maraqlıdır ki, Çinin paytaxtında 62 kq çəki dərəcəsində podiuma çıxan Sərdar çıxışını başa vurmayıb. O, birdən qaldırma hərəkətində 3-cü cəhdində 128 kq çəkini ram etsə də, təkanla qaldırmada sifariş etdiyi 152 kq çəkinin öhdəsindən gələ bilməyib.
Qeyd edək ki, Həsənova kimi yığmamızın digər üzvü Boyanka Kostova da London-2012-də istifadəsi qadağan olunan preparatlardan istifadədə günahlandırılıb. Onun orqanizmində dehidroxlorometiltestosteron və stanozolol maddələri aşkarlanıb. Milliləşdirilmiş legionerimiz Beynəlxalq Ağır Atletika Federasiyasının yekun qərarını gözləyir.

Kostova və Həsənovdan fərqli, ABŞ-ın Hyuston şəhərində təşkil olunan dünya çempionatında dopinq testdən keçə bilməyən Elxan Əliquluzadə, Silviya Angelova, Firudin Quliyev, Valentin Xristov və İntiqam Zairov 8 il müddətinə diskvalifikasiya olunublar. Onların cəzaları 2023-cü ilin dekabrında yekunlaşacaq. Dadaş Dadaşbəyli isə 4 illik cəzaya məruz qalıb. Onun cəza müddəti 2019-cu ilin dekabrınadək nəzərdə tutulub. Həmçinin Xristovun həmin çempionatda qazandığı bürünc medalı əlindən alınıb və yığmamız Rioya qazandığı 4 lisenziyadan məhrum edilib.



Bu yazı

5791 dəfə oxunub

Tarix

2016-07-08 11:04:55

Yazını

Çap et

Yazını

Paylaş

SON XƏBƏRLƏR
Medal sayı
Facebook