Şahmat Olimpiadasının sərgi salonu idmansevərlərdə böyük maraq doğurur


"Baku Kristal Hall”da 42-ci Ümumdünya Şahmat Olimpiadasının ikinci turu keçirilib.

Olimpnews.az saytının məlumatına görə, olimpiadanın ikinci günündə Arzu Əliyeva və ailə üzvləri "Bakı Kristal Hall”a gələrək yarışların keçirildiyi zala baxıb, şahmatçıların oyunlarını izləyib, arenada açılan sərgi ilə tanış olublar.

Beynəlxalq Şahmat Federasiyasının (FIDE) prezidenti Kirsan İlyumjinov məlumat verdi ki, Bakının ev sahibliyi etdiyi 42-ci Şahmat Olimpiadası indiyədək Azərbaycanda keçirilən ən kütləvi yarışdır. Bakıdakı Şahmat Olimpiadasında 175 ölkəni təmsil edən 181 kişi və 142 qadın komandasının 1600-dən çox üzvü, bundan əlavə, yüzlərlə komanda kapitanları və məşqçilər, digər rəsmi nümayəndələr iştirak edirlər. Bu, iştirakçı ölkələrin sayına görə Olimpiada tarixində rekord göstəricidir.

Arzu Əliyeva qadınlar arasında şahmat üzrə dünya çempionu, çinli Yifan Hou ilə söhbət etdi, onunla xatirə şəkli çəkdirdi.

Sonra Arzu Əliyeva və ailə üzvləri Olimpiadanın sərgi salonuna baxdılar. Məlumat verildi ki, Olimpiadanın tamaşaçılarına "Baku Kristal Hall”da təşkil olunan sərgidə iştirak etmək imkanı verilir. Bu sərgidə şahmatla bağlı nadir eksponatlar, həmçinin müxtəlif tarixi yarışlarla bağlı plakatlar nümayiş olunur. Burada yaradılan virtual oyun zonası da böyük maraqla qarşılanır. Şəhərimizin sakinləri və qonaqlar zonada virtual olaraq istənilən şahmatçı ilə oynaya bilərlər.

Daha sonra Arzu Əliyeva və ailə üzvləri şərhçilər otağına da baş çəkdilər. Burada onlara Olimpiadanın gedişi, həmçinin Azərbaycanda şahmatın, o cümlədən uşaq şahmatının inkişafı ilə bağlı ətraflı məlumat verildi.



Bu yazı

17820 dəfə oxunub

Tarix

2016-09-06 00:01:58

Yazını

Çap et

Yazını

Paylaş