Avropa çempionatında qadın güləşçilərimiz mübarizə aparırlar






Rusiya Federasiyasının Kaspiysk şəhərində güləş üzrə böyüklər arasında Avropa çempionatı keçirilir. Yarışlara aprelin 30-da start verilib.

"Olimpnews.az” xəbər verir ki, yarışlarin ilk iki günündə yunan-Roma güləşçiləri mübarizə aparıblar. Komandamız yarışların bürünc mükafatına layiq görülüb.
Üçüncü yarış günündə 50, 55, 59, 68 və 76 kq çəki dərəcələrində qadın güləşçilər mübarizəyə qoşulublar.

Komandamızın lideri Mariya Stadnik (50 kq) Almaniya və Rusiya təmsilçilərini tam üstünlüklə məğlub edərək yarımfinala yüksəlib. Digər güləşçimiz Səbirə Əliyeva (76 kq) isə Macarıstan təmsilçisini məğlub edib və yarımfinala vəsiqə qazanıb.

Mariya Stadnik yarımfinal görüşündə də vaxtından əvvəl qələbə qazanmaqla adını finala yazdırıb. Həlledici görüşdə güləşçimizin rəqibi Rumıniya idmançısı olacaq.

Səbirə Əliyeva isə yarımfinalda Rusiya idmançısına uduzub və bürünc medal görüşünə haqq qazanıb. Həlledici görüşdə onun rəqibi Ukrayna idmançısı olacaq.

59 kq çəkidə yarışan Tatyana Omelçenko da bürünc medal görüşünə çıxacaq, onun rəqibi isə Belarusiya təmsilçisi olacaq.
Sərbəst güləşçilərimiz son iki yarış günündə qüvvələrini sınayacaqlar.
Avropa çempionatına mayın 6-da yekun vurulacaq.




Bu yazı

6176 dəfə oxunub

Tarix

2018-05-03 14:56:40

Yazını

Çap et

Yazını

Paylaş