Azərbaycan Milli Antidopinq Agentliyinin (AMADA) icraçı direktoru Təhminə Tağı-zadənin rəhbərlik etdiyi nümayəndə heyəti Avropa Şurasının Antidopinq Konvensiyasının Monitorinq Qrupunun (T-DO) Fransanın Strasburq şəhərində keçirilən 60-cı iclasında iştirak ediblər.

AMADA-nın mətbuat xidmətindən verilən məlumata görə, tədbirdə idmanda dopinqlə mübarizə sahəsində mühüm addımlar atılıb.

Üzv dövlətlərin və beynəlxalq təşkilatların nümayəndələri antidopinq siyasətləri, davam edən təşəbbüslər və gələcək dövr üçün yeni rəhbərliyin seçilməsi ilə bağlı müzakirələr aparıblar. Sonra T-DO-nun müxtəlif strukturlarına rəhbər vəzifələrə seçkilər keçirilib. Belə ki, Mixal Rinkovski (Polşa) Monitorinq Qrupunun sədri, Mehmet Yoğurtcuoğlu (Türkiyə) sədr müavini, Pol Ouseley (Birləşmiş Krallıq) Uyğunluq, Fredrik Lauritzen (Norveç) Elm üzrə Məsləhət Qrupunun sədri seçiliblər. Səsverməyə əsasən, Florian Kavel (Fransa) Hüquqi məsələlər və Erik Duiven (Niderland) isə Təhsil üzrə Məsləhət Qrupuna yenidən rəhbərlik edəcəklər. Yeni seçilmiş rəhbərlik, Monitorinq Qrupunun uyğunluq, maarifləndirmə, hüquqi çərçivələr və elmi inkişaf sahəsində fəaliyyətini daha da gücləndirmək üçün mühüm rol oynayacaq.

İclas çərçivəsində iştirakçılar Avropada antidopinq siyasətinin gücləndirilməsi, beynəlxalq əməkdaşlığın təşviqi və Antidopinq Konvensiyasına uyğunluğun təmin edilməsi istiqamətində yüksək səviyyəli müzakirələr aparıblar. Yeni rəhbərlik, Ümumdünya Antidopinq Agentliyi (WADA), Beynəlxalq Olimpiya Komitəsi (IOC) və milli antidopinq təşkilatları ilə əməkdaşlığın davam etdirilməsinin vacibliyini vurğulayıb.

Monitorinq Qrupunun yeni sədri Mixal Rinkovski antidopinq səylərinin daha da inkişaf etdirilməsinə və qrupun qlobal antidopinq sistemindəki rolunun möhkəmləndirilməsinə sadiq olduğunu bildirib:

"Bu məsuliyyət mənim üçün böyük şərəfdir. İdmanın dürüstlüyünü qorumaq və dopinqlə mübarizədə birgə səylərimizi gücləndirmək üçün bütün maraqlı tərəflərlə sıx əməkdaşlıq etməyi səbirsizliklə gözləyirəm".

T-DO antidopinq siyasətinin formalaşdırılmasında və Antidopinq Konvensiyasına uyğunluğun təmin edilməsində mühüm platforma olaraq, Avropa Şurasının təmiz idman və ədalətli rəqabət prinsiplərinə sadiqliyini bir daha nümayiş etdirir.

View this post on Instagram

A post shared by Baki Tekstil Fabriki MMC (@btf.az)