17:57 02-04-2025
135
Bakıda FIG “Gimnastika hamı üçün” kollokviumunun açılış mərasimi keçirilib
Azərbaycan Gimnastika Federasiyasının (AGF) təşkilatçılığı ilə UNESCO-nun himayədarlığı altında Bakıda keçirilən FIG “Gimnastika hamı üçün” kollokviumunun açılış mərasimi olub.
AGF-dən verilən məlumata görə, gənclər və idman naziri Fərid Qayıbov Azərbaycanda 2013-cü ildən etibarən inkişaf etdirilən bu növün hazırda Bakıda və regionlarda sürətlə yayıldığını, keçirilən “Challange” tədbirlərini xüsusi vurğulayıb. Həmçinin nazir kollokvium çərçivəsində ölkəmizə səfər edən Beynəlxalq Gimnastika Federasiyasının “Gimnastika hamı üçün” növü üzrə komitə sədri Roqerio Valerio ilə görüş zamanı gimnastikanın inkişafı, beynəlxalq əməkdaşlığın genişləndirilməsi və bu sahədə təcrübə mübadiləsini müzakirə edib.
UNESCO üzrə Azərbaycan Respublikasının Milli Komissiyasının baş katibi Seymur Fətəliyev gimnastikanın inklüziv və əhatəli inkişafının vacibliyini qeyd edib. Bu tədbirin təşkil edilməsinin gimnastikanın daha geniş kütlələrə yayılmasına və sağlam həyat tərzinin təşviqinə geniş imkanlar açdığını bildirib. Həmçinin o, bu kollokvium çərçivəsində aparılan müzakirələrin və mübadilə edilən təcrübələrin gimnastikanın qlobal səviyyədə daha geniş yayılmasına və idmanın hər kəs üçün əlçatan olmasına mühüm töhfə verdiyini, UNESCO üzrə Azərbaycan Respublikasının Milli Komissiyasının hər zaman idmanın inkişafı ilə bağlı layihələrə dəstək verməyə hazır olduğunu diqqətə çatdırıb.
AGF-nin baş katibi Fatimə Şəfizadə isə kollokvium müddətində keçiriləcək seminarların və müzakirələrin bu gimnastika növünün gələcək inkişafı üçün vacibliyini vurğulayıb.
Bununla da kollokvium öz işinə başlayıb. 3 gün davam edəcək tədbirdə beynəlxalq ekspertlər, məşqçilər və gimnastika həvəskarları bir araya gələrək təcrübə mübadiləsi aparacaq, müasir inkişaf strategiyalarını müzakirə edəcəklər. Tədbir idmanın cəmiyyətə inteqrasiyası, sağlam həyat tərzinin təbliği və gimnastikanın daha geniş auditoriya üçün əlçatan olması kimi mövzulara diqqət yetirəcək. 39 ölkədən 52 nümayəndənin iştirak etdiyi tədbir bu növ üzrə Azərbaycanda keçirilən ilk kollokviumdur.
