Azərbaycanın yunan-Roma güləşçiləri Slovakiyanın paytaxtı Bratislavada keçirilən Avropa çempionatında mübarizəyə başlayırlar.

Klassiklərin mübarizəsində ilk olaraq 5 idmançımız xalça üzərinə çıxacaq. Ölkəmizi 55 kq çəki dərəcəsində Eldəniz Əzizli, 63 kq-da Murad Məmmədov, 77 kq-da Sənan Süleymanov, 87 kq-da İslam Abbasov və 130 kq-da Beka Kandelaki təmsil edəcək. Güləşçilərimiz medal uğrunda gərgin rəqabətə qoşularaq finala vəsiqə qazanmağa çalışacaqlar. Bu çəkilərdə medal qarşılaşmaları sabah keçiriləcək. 

Bundan başqa, qadın güləşi üzrə təmsilçimiz Jalə Əliyeva (57 kq) da bu gün bürünc medal uğrunda xalçaya çıxacaq. O, finlandiyalı Cenna Hemyae ilə qarşılaşacaq. Qeyd edək ki, J.Əliyeva yarımfinalda zədələndiyi üçün rəqibinə məğlub olmuşdu.

Xatırladaq ki, Avropa çempionatının ilk mərhələsində sərbəst güləşçilərimiz ölkəmizə parlaq uğurlar qazandırıblar. Komandamız 1 qızıl, 1 gümüş və 4 bürünc medal əldə edib. Giorgi Meşvildişvili (125 kq) Avropa çempionu adını qazanıb. Osman Nurməhəmmədov (92 kq) gümüş medala layiq görülüb. İslam Bazarqanov (57 kq), Əli Rəhimzadə (65 kq), Kənan Heybətov (70 kq) və Ağanəzər Novruzov (74 kq) isə bürünc medala sahib çıxıb.

Bu nəticələrlə Azərbaycan sərbəst güləş millisi komanda hesabında Avropa çempionu olub. Qitə birinciliyinə aprelin 13-də yekun vurulacaq.

View this post on Instagram

A post shared by Baki Tekstil Fabriki MMC (@btf.az)