Azərbaycan Triatlon Federasiyasında (ATF) milli komandanın yeni baş məşqçisinin təqdimatı və son iki ilin fəaliyyətini əhatə edən hesabat tədbiri təşkil olunub.

Azərbaycan Triatlon Federasiyasının mətbuat xidmətindən verilən məlumata görə, tədbiri giriş sözü ilə açan ATF prezidenti Fərid Fərhadzadə ölkədə idmanın inkişafına göstərilən dövlət dəstəyini xüsusi vurğulayıb. O bildirib ki, regionlarda yaradılan müasir idman infrastrukturu triatlon idman növünün genişlənməsi və kütləviləşməsi üçün əlverişli zəmin yaradır.

Tədbirin davamında Azərbaycan triatlon üzrə milli komandasının yeni baş məşqçisi Aleksandr Mordasov ictimaiyyətə təqdim olunub. Baş məşqçi çıxışı zamanı qarşıdakı dövr üçün hazırlıq planlarını, idmançı heyətinin gücləndirilməsi istiqamətində nəzərdə tutulan addımları və beynəlxalq yarışlarda nəticələrin yüksəldilməsi ilə bağlı hədəflərini açıqlayıb.

Ardınca federasiyanın baş katibi Seymur Hüseynov tərəfindən son iki ilin fəaliyyətini əhatə edən hesabat təqdim olunub. Hesabatda həm yerli, həm də beynəlxalq səviyyədə keçirilən yarışlar, idmançıların qazandığı uğurlar, eləcə də federasiyanın yaxın dövr üçün planları ətraflı şəkildə əksini tapıb.

Tədbirdə federasiyanın vitse-prezidentləri və İcraiyyə Komitəsinin üzvləri də çıxış edərək triatlonun ölkədə inkişaf perspektivlərinə dair fikir və tövsiyələrini səsləndiriblər.

Yığıncaq fikir mübadiləsi və gələcək əməkdaşlıq imkanlarının müzakirəsi ilə başa çatıb.

View this post on Instagram

A post shared by Baki Tekstil Fabriki MMC (@btf.az)