"Bu gün növbəti dəfə işğaldan azad edilmiş tarixi torpağımızda idman bayramına toplaşmışıq".
Bu sözləri Azərbaycan Kanoe və Avarçəkmə Federasiyasının mətbuat katibi Vüsal Qurbanov deyib.
Ötən il Füzuli şəhərinin işğaldan azad olunması günü münasibətilə, oktyabrın 17-də Aşağı Köndələnçay su anbarında avarçəkmə üzrə "Mingəçevir Reqatası-2024"ün rəsmi açılış mərasimi təşkil olunduğunu xatırladan federasiya nümayəndəsi bu yarışın əhəmiyyətini qeyd edib:
"Ötən il işğaldan azad edilmiş Füzuli şəhərinin ikinci dəfə şəhər günü qeyd edilidiyi ərəfədə Füzuli şəhərində "Mingəçevir Reqatası-2024"ün rəsmi açılış mərasimi təşkil olunmuşdu. Həmin beynəlxalq turnir şəhərdə əsl bayram ab-havası yaratmışdı. Bu gün də federasiya rəhbərliyi və nümayəndələri "Prezident Kuboku-2025" çərçivəsində Füzulidədir. Köndələnçay su anbarında ümummilli lider Heydər Əliyevin anadan olmasının 102-ci ildönümünə həsr olunmuş beynəlxalq reqata çərçivəsində yerli sakinlər üçün xüsusi tədbir keçirildi. Əsas məqsədimiz Füzuli sakinləri üçün idman bayramı təşkil etməkdir. Tədbir çərçivəsində avarçəkənlərin nümunəvi çıxışları nümayiş etdirildi. Füzuliyə köç edən sakinlərə isə peşəkar məşqçilərin nəzarəti altında həvəskar qayıqlarda avar çəkmək imkanı yaradıldı. Bundan əlavə, uşaqlar və yeniyetmələr üçün maraqlı viktorinalar təşkil olundu və qaliblər federasiya tərəfindən mükafatlandırıldı".
Vüsal Qurbanov əlavə edib ki, sabah Mingəçevirdə beynəlxalq reqatanın paradı keçiriləcək, növbəti gün isə Suqovuşanda yarışların açılış mərasimi və ilk çıxışlar baş tutacaq. “Prezident Kuboku-2025” beynəlxalq reqatası mayın 1-2-də Mingəçevir “Kür” Olimpiya Tədris-İdman Mərkəzində davam edəcək.

View this post on Instagram

A post shared by Baki Tekstil Fabriki MMC (@btf.az)