Milli Olimpiya Komitəsinin kollektivi Zəfər parkını ziyarət edib
27 Sentyabr Anım Günü ilə əlaqədar Milli Olimpiya Komitəsinin kollektivi Zəfər parkını ziyarət edib.
Olimpnews.az xəbər verir ki, Milli Olimpiya Komitəsinin vitse-prezidentləri Çingiz Hüseynzadə, Zemfira Meftaxetdinova, Fərid Mansurov, MOK-un İcraiyyə Komitəsinin üzvləri, Olimpiya çempionları və idman ictimaiyyətinin nümayəndələri Zəfər abidəsi önünə gül dəstələri düzərək, şəhidlərin əziz xatirəsini ehtiramla yad ediblər.
Azərbaycan Prezidenti, Müzəffər Ali Baş Komandan İlham Əliyevin 2020-ci il 2 dekabr tarixli Sərəncamına əsasən Vətən müharibəsinin başlandığı gün - 27 sentyabr Anım Günü kimi qeyd edilir. 44 gün ərzində Azərbaycan ordusu dünyaya öz gücünü göstərərək, düşmən üzərində şanlı zəfər qazanmışdır. Anım Günündə Azərbaycan xalqı, bütün dünya azərbaycanlıları Vətənimiz uğrunda canlarından keçən şəhidlərimizin xatirəsini dərin ehtiramla yad edirlər.
