"Judo Club 2012”nin cüdoçuları fəxri kürsüdə
Sentyabrın 27-də Çexiyanın paytaxtı Praqada cüdo üzrə açıq Avropa turnirinə start verilib.
Olimpnews.az xəbər verir ki, yarışın ilk günündə Azərbaycan millisinin 4 üzvü medal qazanıb ki, onların 3-ü “Judo Club 2012”nin idmançılarının payına düşüb.
Klubun nümayəndələrindən Nazir Talıbov (-66 kq) gümüş medala sahib çıxıb. -60 kq çəki dərəcəsində tatamiyə çıxan Hüseyn Allahyarov və Murad Muradlı isə fəxri kürsünün üçüncü pilləsində qərarlaşıblar.
Azərbaycan yığmasının heyətində günün yeganə qızıl medalını isə İslam Rəhimov (-66 kq) qazanıb. Bununla da komandamız ilk yarış gününü 1 qızıl, 1 gümüş və 2 bürünc medalla başa vuraraq ümumi komanda hesabında ikinci, kişilərin mübarizəsində isə birinci pillədə qərarlaşıb.
Qeyd edək ki, turnirdə 35 ölkədən 405 idmançı mübarizə aparır. Azərbaycan komandası 11 çəki dərəcəsində 23 cüdoçu (15 kişi, 8 qadın) ilə təmsil olunur.
