Milli Məclis sədrinin müavini, Azərbaycan Kikboksinq Federasiyasının fəxri prezidenti Adil Əliyev beynəlxalq yarışlarda qələbə qazanan idmançılarla görüşüb.
"Milli Məclisdə növbəti dəfə ölkəmizi beynəlxalq yarışlarda uğurla təmsil edən idmançılarımızla görüşdük. Prezident İlham Əliyev və Birinci Vitse-prezident Mehriban Əliyeva tərəfindən idmana və idmançılara göstərilən yüksək diqqət və qayğı nəticəsində ölkəmiz dünyada idman ölkəsi olaraq tanınır. İdmançılarımızın qazandıqları nailiyyətlər, ölkəmizin olimpiadalara və idman yarışlarını yüksək səviyyədə təşkil etməsi idmanı Azərbaycanın brendlərindən birinə çevirmişdir. Qəhrəmanlarımızın döyüş meydanında qazandığı tarixi Zəfər, idmançılarımızın isə peşəkar yarışlardakı uğurları onu deməyə əsas verir ki, Azərbaycan xalqına yalnız Qələbə yaraşır",- deyə A.Əliyev qeyd edib.
Qeyd edək ki, bu günlərdə kikboksinq üzrə Azərbaycan Milli Komandası Türkiyənin Antalya şəhərində keçirilən böyüklər və veteranlar arasında WAKO Avropa çempionatında iştirak edib. Milli komandamız böyüklər arasında 2 qızıl, 5 gümüş, 6 bürünc, veteranlar arasında isə 2 qızıl və 2 bürünc medal olmaqla ümumilikdə 17 medalla Vətənə qayıdıblar.