MÜSAHİBƏ
Çingiz Hüseynzadə: "Füzulidə təşkil olunan bu yarışın bizim üçün çox böyük əhəmiyyəti var"
"Bu gün burada belə böyük beynəlxalq yarışın keçirilməsi də əldə etdiyimiz qələbə ilə əlaqədardır".
Bu sözləri Milli Olimpiya Komitəsinin vitse-prezidenti Çingiz Hüseynzadə "Mingəçevir Reqatası-2024”ün rəsmi açılış mərasimindən sonra jurnalistlərə müsahibəsində deyib.
Çingiz Hüseynzadə 2020-ci ilin 17 oktyabr tarixində Füzuli şəhərinin işğaldan azad edildiyini xatırladaraq bu günün cənab Prezident İlham Əliyevin Sərəncamı ilə Füzuli günü kimi qeyd edildiyini bildirib.
"Füzulidə təşkil olunan bu yarışın bizim üçün çox böyük əhəmiyyəti var. Bildiyiniz kimi bu gün Füzuli günüdür. Ötən il cənab Prezident İlham Əliyevin Sərəncamı ilə 17 oktyabr tarixi Füzuli günü kimi qeyd edilir. Bu yarış həm də şəhidlərimizin xatirəsinə, qazilərimizin şərəfinə keçirilən bir yarışdır. Yarışda bu qədər xarici qonağın iştirakı da xüsusi əhəmiyyət kəsb edir. Bildiyiniz kimi Bakıda gimnastika üzrə böyük tədbir keçirilir. Bu yarışın iştirakçıları da məhz Füzuliyə gəlib və yarışları izləyirlər.
Ümumiyyətlə, Azərbaycanda son illərdə kanoe və avarçəkmə idman növü inkişaf mərhələsindədir. Ümid edirəm ki, istər Suqovuşanda, istər Füzulidə, istərsə də Mingəçevirdə bizim gələcək böyük idmançılarımız yetişəcək", - deyə Çingiz Hüseynzadə bildirib.
Qeyd edək ki, "Mingəçevir Reqatası-2024"ə oktyabrın 18-də yekun vurulacaq.
Paylaş :
