Serbiyanın ev sahibliyi etdiyi Gimnaziada İdman Oyunlarının təntənəli açılış mərasimi keçirilib.

Tədbir Zlatibor şəhərinin mərkəzində təşkil olunub.

Mərasimdə Azərbaycan Bayrağını boks üzrə Avropa üçüncüsü Kəmalə Həsənova və yunan-Roma güləşçisi, yeniyetmələr arasında Avropa çempionu Qurban Məcnunov dalğalandırıblar.

Gənclər və İdman Nazirliyinin nümayəndəsi Nailə Xanlarova feyr-pleylə bağlı danışıb. O, yarışlar zamanı Azərbaycan komandasının ədalətli və mehriban şəkildə mübarizə aparacağını, eləcə də hakimlərin verdiyi qərarlara hörmətlə yanaşacağını bildirib.

Tədbirdə Serbiyanın gənclər və idman naziri Zoran Qayiç, Beynəlxalq Məktəb İdmanı Federasiyasının prezidenti Youssef Belqasmi və digər rəsmi şəxslər iştirak ediblər.

Rəsmi çıxışlardan sonra Gimnaziada İdman Oyunları açıq elan olunub.

Açılış mərasimi bədii hissə ilə davam edib. Musiqi sədaları altında maraqlı rəqs şouları nümayiş olunub.

Qeyd edək ki, yarışda 56 ölkənin 2742 idmançısı mübarizə aparacaq. Azərbaycan 18 idman növündə - idman gimnastikası (Novi-Sad), kamandan oxatma, 3x3 basketbol, çimərlik voleybolu, boks, şahmat, tennis (Zlatibor), badminton, parabadminton, üzgüçülük, paraüzgüçülük, stolüstü tennis (Ujiçe), taekvondo, karate (Pojeqa), cüdo, güləş (Luçani), qılıncoynatma (Nova-Varoş), atletika (Priboy) üzrə ümumilikdə 191 idmançı ilə təmsil olunacaq.

View this post on Instagram

A post shared by Baki Tekstil Fabriki MMC (@btf.az)