Cüdoçularımız qitə çempionatına hazırlığı davam etdirirlər
Böyüklər arasında Avropa çempionatına hazırlığı davam etdirən cüdo üzrə Azərbaycan yığmasının media üçün açıq məşqi keçirilib.
Milli komandamızın üzvləri ilə birgə Bəhreyn, Mərakeş və İsraildən olan cüdoçular da hazırlıq keçirlər.
Azərbaycanı Avropa çempionatında təmsil edəcək ilkin heyət artıq müəyyənləşib. İlkin siyahıya 9 kişi və 6 qadın olmaqla ümumilikdə 15 cüdoçu daxil edilib. Azərbaycan yığmasının yekun heyəti isə yarışa az qalmış açıqlanacaq.
Milli komandaların ilkin heyətində Balabəy Ağayev, Əhməd Yusifov (hər ikisi 60 kq), Turan Bayramov (66 kq), Hidayət Heydərov (73 kq), Zelim Tçkayev, Ömər Rəcəbli (hər ikisi 81 kq), Murad Fətiyev (90 kq), Zelim Kotsoyev (100 kq), Kənan Nəsibov (+100 kq), Könül Əliyeva, Şəfəq Həmidova (hər ikisi 48 kq), Leyla Əliyeva, Gültac Məmmədəliyeva (hər ikisi 52 kq), Südabə Ağayeva (70 kq), Madina Kaisinova (+78 kq) yer alıblar.
Avropa çempionatında idmançılara kişilərdən ibarət yığmanın baş məşqçisi Riçard Trautman, böyük məşqçilər Elxan Məmmədov, Elçin İsmayılov, Slavko Tekiç və Robert Kravçik, həmçinin qadınlardan ibarət yığmanın baş məşqçisi Amina Abdellatif və böyük məşqçi Saşa Herkenrat-Vimar rəhbərlik edəcəklər.
Azərbaycan Cüdo Federasiyasının hakimlər heyətinin üzvü, A kateqoriyalı beynəlxalq dərəcəli hakim Nazim Umbayev də turnirdə ədalət təmsilçiləri sırasında yer alacaq.
Yığmanın media üçün açıq məşqi zamanı Azərbaycan millisinin baş məşqçisi və performans direktoru Riçard Trautman hazırlıq prosesini dəyərləndirərək bildirib ki, komanda qarşıya qoyulan hədəflərə uyğun şəkildə hazırlaşır: “Hazırlığımız istədiyimiz kimi keçir. Hər çəkidə medal qazanmaq şansımız var. Ötən il Avropa çempionatında 5 medal qazandıq və bu dəfə nəticələrimizi daha da yaxşılaşdırmaq istəyirik. Əsas məqsədimiz qızıl medal əldə etməkdir. Bununla yanaşı, bu il Bakıda keçiriləcək dünya çempionatı da bizim üçün xüsusi əhəmiyyət daşıyır və əsas hədəflərimizdən biridir”.
Qadınlardan ibarət yığmanın baş məşqçisi Amina Abdellatif də komandanın hazırlıq səviyyəsindən razılığını ifadə edib. Onun sözlərinə görə, komanda artıq bir sıra təlim-məşq toplanışlarında iştirak edib və yarışa tam hazırdır: “Avropa çempionatına hər zaman yüksək motivasiya ilə yollanırıq. Qarşımıza medal qazanmaq məqsədi qoymuşuq. Bu yarış Bakıdakı dünya çempionatından əvvəl bizim üçün son ciddi sınaqdır və burada uğurlu çıxış etmək istəyirik”.
Qeyd edək ki, cüdo üzrə böyüklər arasında Avropa çempionatı aprelin 16-19-da Gürcüstanın paytaxtı Tbilisidə keçiriləcək. Qitə birinciliyində 46 ölkədən 409 (232 kişi və 177 qadın) cüdoçu 14 dəst medal uğrunda mübarizə aparacaq.
jpg-1776240238.jpg)
