MOK-un Atletlər Komissiyasının nümayəndələri XIV Beynəlxalq İdman Forumunda iştirak edir

MOK

Bugün, 13:50

Rusiya Federasiyasının Krasnoyarsk şəhərində oktyabrın 21-dən etibarən start götürən XIV “Rusiya – idman dövlətidir” Beynəlxalq İdman Forumu öz işini davam etdirir.

Olimpnews.az xəbər verir ki, Rusiya Federasiyasının İdman Nazirliyi və Roskonqress Fondu tərəfindən, Rusiya Federasiyası Hökumətinin dəstəyi ilə təşkil olunan forumda ölkəmizi Milli Olimpiya Komitəsinin (MOK) idman idarəsinin müdiri Həsənağa Rzayev və Atletlər Komissiyasının üzvü, üzgüçülük üzrə Rio-2016 Yay Olimpiya Oyunlarının iştirakçısı Fatimə Alkərəmova təmsil edirlər.

Forum çərçivəsində Milli Olimpiya Komitələrinin Atletlər Komissiyalarının nümayəndələri üçün “MOK Atletlər Komissiyası: İştirakdan idarəetməyə doğru” mövzusunda xüsusi sessiya təşkil olunub. Sessiyada 7 ölkədən (Azərbaycan, Rusiya, Belarus, Kamboca, Laos, Qırğızıstan, Tacikistan) 20 nümayəndə və 7 spiker iştirak edir.

Sessiyanın əsas məqsədi müxtəlif ölkələrin Atletlər Komissiyalarının nümayəndələrini bir araya gətirmək, təcrübə mübadiləsi aparmaq, komissiyaların Milli Olimpiya Komitələrinin idarəetmə sistemindəki rolunu müzakirə etmək və gələcək əməkdaşlıq imkanlarını araşdırmaqdır. Görüşdə idmançıların maraqlarının təmsil olunması, qərarların qəbulu prosesində real iştirakı, eləcə də idmançıların rifahı, təhsili, liderlik bacarıqlarının inkişafı və karyeradan sonrakı dəstək proqramları ətrafında geniş fikir mübadiləsi aparılacaq.

XIV Beynəlxalq İdman Forumu çərçivəsində, həmçinin idman sənayesinin yeni texnologiyalarının sərgisi, ustad dərsləri və müxtəlif idman-kütləvi tədbirlər təşkil olunacaq.

Qeyd edək ki, forum oktyabrın 23-dək davam edəcək.