Milli Olimpiya Komitəsinin (MOK) vitse-prezidenti Çingiz Hüseynzadə və baş katibin müavini Azər Əliyev Tokioda Olimpiya kəndinə səfər ediblər. Olimpiya Kəndində Azərbaycan nümayəndə heyətinin rəhbərliyi ilə görüşən Çingiz Hüseynzadə və Azər Əliyev idmançıların hazırlığı ilə tanış olublar.
MOK-un vitse-prezidenti çətin şəraitdə olmasına baxmayaraq idmançılarımızdan böyük nəticələr gözlədiyini bildirib.
Olimpiya Kəndini çox bəyəndiyini söyləyən Ç.Hüseynzadə Olimpiadanın açılış mərasimi barədə də fikirlərini bölüşüb: “Bizim idmançılar da paraddan keçəcəklər. Onların hamısı indi burada yoxdur. Əsas idmançılarımız – güləşçilər, karateçilər, gimnastlar hələ Tokioya gəlməyib. Onların çıxışları Olimpiadanın son günlərində olacaq”.
MOK rəsmisi açılış mərasimində Azərbaycanın məhdud sayda heyətlə təmsil olunacağını vurğulayıb: “Bu gün açılışa buradakı idmançılarımız çıxacaq. Biz sabah yarışı olan idmançıları açılış mərasiminə aparmayacağıq. 20-30 nəfərlik nümayəndə heyətimiz açılışda iştirak edəcək. Ümid edirəm ki, bu açılışda heyətimiz çox gözəl və təntənəli şəkildə bizim televiziya tamaşalarının qarşısından keçəcək”.
MOK vitse-prezidenti atletlərin COVID-19 testini verməsi prosesi ilə, yerləşdikləri otaqlar və yeməkxana ilə maraqlanıb.
Çingiz Hüseynzadə və Azər Əliyev Olimpiya kəndində idmançılarla görüşüb
