Azərbaycan Ordusunun Təlim və Tədris Mərkəzində Yasamal rayon orta ümumtəhsil məktəbliləri arasında “Şahin” hərbi-idman oyunu üzrə rayon birinciliyi  keçirilib.
Yasamal rayon Gənclər və İdman  İdarəsinin  təşkilatçılığı  ilə keçirilən birincilikdə Azərbaycan Respublikasının  Dövlət  Himni səsləndirildikdən  sonra  torpaqlarımızın  bütövlüyü  uğrunda  həlak  olmuş  şəhidlərimizin  xatirəsi  1 dəqiqəlik  sükutla  yad  edilib.  Daha  sonra  çıxış  üçün söz Yasamal rayon Gənclər və İdman İdarəsinin rəisi İlham Səfərova verilib. İlham Səfərov yarış  iştirakçılarını salamlayaraq  komandalara  uğurlar  arzulayıb. İlham Səfərov qeyd edib ki, yeniyetmə və gənclər arasında hərbi-vətənpərvərlik tərbiyəsi işinin təşkili, onlar arasında vətənpərvərlik tərbiyəsinin aşılanması, məktəbliləri hərbi-idman oyunlarına cəlb etməklə onların ordu sıralarında hərbi xidmətə hazırlanmasına kömək göstərmək gənclərlə iş sahəsində idarə qarşısında duran başlıca vəzifələrdən biridir. İlham Səfərov bildirib ki, 44 günlük Vətən müharibəsi xalqımızın, o cümlədən ordumuzun yüksək hərbi-vətənpərvərlik ruhunu bir  daha  nümayiş  etdirdi və Azərbaycan Respublikasının Prezidenti, Müzəffər Ali  Baş  Komandan İlham Əliyev cənablarının  rəhbərliyi altında torpaqlarımız işğaldan azad edildi, 30 illik yurd həsrətinə son qoyuldu.
Sonra “Qarabağ Müharibəsi Əlilləri, Veteranları və Şəhid Ailələri” İctimai Birliyinin Yasamal rayon təşkilatının sədri Bəhram Şeydayev çıxış edib. Bəhram Şeydayev iştirakçılara uğurlar arzulayıb və çıxışında bildirib ki, Azərbaycan ordusu indi regionun ən güclü ordusu olmaqla yüksək peşəkar əsgər və zabit heyətinə malikdir. O qeyd edib ki, Vətən müharibəsi Azərbaycan ordusunun döyüş qabiliyyətini bütün dünyaya nümayiş etdirdi, ordumuz  şanlı qələbə qazandı.    
Qarabağ müharibəsi qaziləri və digər rəsmi şəxslərin iştirak etdiyi təntənəli açılış mərasimi başa çatdıqdan sonra komandalar yarışın əsasnaməsinə  müvafiq olaraq mərhələlər üzrə yarışa başlayıblar.
Birincilikdə rayon ərazisində fəaliyyət göstərən 19 tam orta ümumtəhsil məktəbin  komandası öz qüvvəsini sınayıb. Yarışın  yekun nəticəsinə görə birinci yerə 158 saylı tam  orta məktəbin komandası layiq görülüb. 31 saylı tam orta məktəbin komandası ikinci, 175 saylı tam orta məktəbin komandası isə üçüncü yerə sahib çıxıb. Rayon  mərhələsinin qalibi olmuş komanda Bakı şəhər zona birinciliyində rayonu təmsil etmək  hüququ  qazanıb.