Türkiyənin İstanbul şəhərində Beynəlxalq Cüdo Federasiyasının və Avropa Cüdo Birliyinin Tibb Komissiyalarının birgə təşkilatçılığı ilə seminar keçirilib. Seminarda Azərbaycan Cüdo Federasiyasının həkimləri də iştirak ediblər. Seminar zamanı Azərbaycanın cüdo üzrə milli yığmalarının baş həkimi Ramil Vəliyev Avropa Cüdo Birliyinin Tibb Komissiyasının üzvü seçilib. O, gələn ildən etibarən Avropa Cüdo Birliyinin təqvimində olan yarışlarda komissar həkim kimi fəaliyyət göstərəcək. Ramil Vəliyev Avropa Cüdo Birliyinin Tibb Komissiyasında fəaliyyət göstərəcək ilk azərbaycanlı həkim olacaq.
“Avropa Cüdo Birliyinin Tibb Komissiyasının üzvü seçildiyim üçün qürur hissi keçirirəm. Son bir ildə Azərbaycan Cüdo Federasiyası elmi yanaşmaya və təhsilə xüsusi önəm verir, həmçinin cüdonun ölkədə hər ərəfli inkişafı üçün böyük səylər göstərir. Bu il ərzində Federasiyanın həkimləri, fizioterapevtləri və masajistləri bir çox beynəlxalq və yerli seminarlarda iştirak ediblər. Bu vəzifəyə təyin olunmağımla əlaqədar Azərbaycan Cüdo Federasiyasına, Avropa Cüdo Birliyinə və bütün cüdo ailəsinə təşəkkürümü bildirirəm.”, - deyə R.Vəliyev bildirib.
Qeyd edək ki, Ramil Vəliyev 2012-ci ildən cüdo üzrə milli yığma komandaların həkimi vəzifəsində çalışır və 2021-ci ildən baş həkim təyin edilib.
Cüdo üzrə millillimizin baş həkimi Avropa Cüdo Birliyinin Tibb Komissiyasının üzvü seçilib
