Tomas Bax: “MOK-un fəaliyyətini yüksək qiymətləndiririk”

Olimpizm xəbərləri

06.06.2023, 12:09

Taekvondo üzrə 26-cı dünya çempionatında iştirak üçün ölkəmizdə səfərdə olan Beynəlxalq Olimpiya Komitəsinin prezidenti Tomas Bax Milli Olimpiya Komitəsinin mətbuat orqanı olan “Olimpiya dünyası” qəzetinə eksklüziv olaraq öz fikirlərini bildirib. BOK-un prezidenti deyib: “Azərbaycan idman ölkəsi kimi dünyada özünü təsdiq edib. Bu ölkə beynəlxalq yarışlara uğurla ev sahibliyi edir. Təbii ki, bütün bu fəaliyyətlər Olimpiya Hərəkatının və idmanın daha da inkişafı və kütləviləşməsi üçün çox vacib bir amildir. Azərbaycanın taekvondo üzrə dünya çempionatına və Dünya Taekvondosunun 50 illik yubiley tədbirinə ev sahibliyi etməsi tarixi hadisədir. Azərbaycan Milli Olimpiya Komitəsi də Olimpiya Hərəkatının inkişafına öz töhfəsini verir. MOK-un fəaliyyətini yüksək qiymətləndiririk. Bizim təşəbbüskarı olduğumuz layihələrin təbliği istiqamətində görülən işlərdən xəbərimiz var. Bütün idman ictimayyəti uşaqların və ümumiyyətlə, hər kəsin idmanla böyük həvəslə məşğul olmaları üçün münasib şəraitin yaradılması istiqamətində əlindən gələni etməlidir. Hamıya idmanda özünü rahat və güvənli hiss etməsi üçün şərait yaradılmalıdır. Əminəm ki, Azərbaycan Milli Olimpiya Komitəsi də dünya Olimpiya ailəsinin fəal və dəyərli üzvlərindən biri kimi bundan sonra da böyük uğurla fəaliyyət göstərəcəkdir”.