Maribor-2023-ün bürünc mükafatçısı: “Bu yarış bizim üçün bir təcrübə oldu” - MÜSAHİBƏ

Olimpizm xəbərləri

26.07.2023, 22:53

“Bu yarış bizim üçün bir təcrübə oldu. Qarşıda bizi dünya çempionatı gözləyir. Çalışacağam ki, həmin yarışda daha yüksək nəticə əldə edim”.

Bu sözləri “Olimpiya dünyası” qəzetinə müsahibədə XVII Avropa Gənclər Olimpiya Festivalının cüdo yarışlarının bürünc medalçısı Məhəmməd Musayev bildirib.

O, Maribordan qazandığı uğura görə məşqçilərinə minnətdarlıq etməyi də unutmayıb:

“Üçüncü yer uğrunda görüşdə gürcüstanlı idmançı ilə qarşılaşdım. Bu mübarizədən əvvəl ona qarşı taktikanı beynimdə qurmuşdum. Güclü rəqib olmasına baxmayaraq, bu mübarizədən qalib ayrılmağı bacardım. Maribor-2023-də qazandığım bu uğura görə, şəxsi məşqçim Hikmət Əliyevə və yığma komandanın baş məşqçisi Rüstəm Alimliyə minnətdarlığımı bildirirəm. Onların üzərimdə əziyyəti danılmazdır. Çalışdım ki, məqşçilərimin mənə olan etimadını doğruldum”.