Beynəlxalq Olimpiya Günü münasibəti ilə “Xatirələrdə yaşayanlar” adlı tədbir keçirilib

MOK

23.06.2026, 14:19

Bu gün 23 iyun - Beynəlxalq Olimpiya Gününə həsr olunmuş, Azərbaycan idmanının şanlı tarixini yazmış, ölkəmizə Olimpiya zəfərləri qazandırmış və artıq aramızda olmayan əfsanəvi idmançılarımızın və idman xadimlərimizin əziz xatirəsinə həsr olunmuş “Xatirələrdə yaşayanlar” adlı tədbir keçirilib.

Olimpnews.az xəbər verir ki, Milli Olimpiya Komitəsinin (MOK), Gənclər və İdman Nazirliyi və Azərbaycan İdman Veteranlari İctimai Birliyinin təşkilatçılığı ilə keçirilən tədbir Bakı Gənclər Mərkəzində təşkil olunub.

Tədbirdə Milli Olimpiya Komitəsinin vitse-prezidenti Çingiz Hüseynzadə, MOK-un vitse-prezidenti, Azərbaycan İdman Veteranları İctimai Birliyinin sədri Zemfira Meftaxetdinova, Suraxanı rayon İcra Hakimiyyətinin başçısı Adil Əliyev, millət vəkili Könül Nurullayeva, Olimpiya çempionları, idman veteranları və idman ictimaiyyətinin digər nümayəndələri iştirak ediblər.

Tədbirdən əvvəl mərhum idman veteranlarına həsr olunmuş fotosərgisinə baxış keçirilib.

Tədbirin rəsmi hissəsində dünyasını dəyişmiş əfsanəvi idmançılarımızın əziz xatirəsi bir dəqiqəlik sükutla yad edilib. Ardınca Azərbaycan Respublikasının Dövlət himni səsləndirilib. Sonra Olimpiya günü çərçivəsində idman tariximizin qəhrəmanlarına və idman veteranlarımızın şərəfli ömür yoluna həsr olunmuş sənədli film nümayiş etdirilib.

Milli Olimpiya Komitəsinin vitse-prezidenti Çingiz Hüseynzadə çıxış edərək tədbirin əhəmiyyətini vurğulayıb.

“Bu gün həqiqətən çox maraqlı və təsirli gündür. Tədbirdən əvvəl foyedə təşkil olunan sərgi Azərbaycan idmanının nə qədər zəngin tarixə malik olduğunu bir daha göstərdi. İdmançı və məşqçilərin fəaliyyətinin bu cür qeyd olunması qürurvericidir. Bu gün tədbirdə iştirak edən veteranlar arasında Olimpiya və dünya çempionları, eləcə də dünya rekordçuları var. Azərbaycan idmanı böyük inkişaf yolu keçib və bu uğurlarda bu gün burada əyləşən veteranlarımızın çox böyük payı var", - deyə Çingiz Hüseynzadə qeyd edib.

MOK rəsmisi çıxışının sonunda tədbir iştirakçılarını və veteranları Beynəlxalq Olimpiya Günü münasibətilə təbrik edib.

Gənclər və idman nazirinin müavini Fərhad Hacıyev çıxışında bildirib ki, tədbirdə nümayiş olunan film və sərgi Azərbaycan idmanının zəngin tarixi və güclü ənənələrini bir daha nümayiş etdirir. Nazir müavini veteranları gənc idmançılara dəstək olmağa və öz təcrübələrini bölüşməyə çağıraraq, Azərbaycanın idman uğurlarının davamlı olacağına inamını ifadə edib.

Suraxanı Rayon İcra Hakimiyyətinin başçısı Adil Əliyev çıxışında Beynəlxalq Olimpiya Günü münasibətilə veteran idmançıları təbrik edib, onlara möhkəm cansağlığı və uzun ömür arzulayıb. Adil Əliyev vurğulayıb ki, veteranlar Azərbaycan idmanının canlı tarixidir və onların keçdiyi yol, qazandıqları uğurlar gənc nəsil üçün mühüm örnəkdir.

Tədbirdə çıxış edən Zemfira Meftaxetdinova Azərbaycan idman ailəsinin üzvü olması ilə fəxr etdiyini bildirib. O, veteran idmançılara Azərbaycan Prezidenti tərəfindən göstərilən diqqət və qayğıya görə minnətdarlığını bildirib.

Qeyd edib ki, tədbir çərçivəsində nümayiş etdirilən tarixi kadrlar şanlı idman yolunu bir daha xatırladıb və bu gün gənclərin həmin yolu uğurla davam etdirdiyini göstərib. Olimpiya çempionu Beynəlxalq Olimpiya Günü münasibətilə veteranları və idmançıları təbrik edərək, onlara cansağlığı və uğurlar arzulayıb.

Tədbirdə çıxış edən professor Dilqəm Quliyev Olimpiya Hərəkatının mahiyyətindən danışaraq iştirakçıları bayram münasibətilə təbrik edib. O bildirib ki, Azərbaycanda idman və Olimpiya Hərəkatının inkişafında veteran idmançıların rolu əvəzsizdir və onların qazandıqları nailiyyətlər gənc nəsil üçün mühüm nümunədir.

O, çıxışının sonunda Milli Olimpiya Komitəsinin dəstəyi ilə nəşr olunan “Olimpiya Təhsili” adlı dərs vəsaitini Milli Olimpiya Komitəsinin vitse-prezidenti Çingiz Hüseynzadəyə təqdim edib.

Tədbirin sonunda xatirə şəkli çəkdirilib.