Paris-2024 Yay Olimpiya Oyunlarında daha bir yarış gününə yekun vuruldu. Ötən gün Azərbaycanın iki idmançısı və 3x3 basketbol millisi mübarizə apardı. İdmançılarımız komandamızın aktivinə aktivinə daha 2 medal yazdırdılar.
Təmsilçilərimizdən Zelim Kotsoyev cüdo yarışlarında bütün rəqiblərinə qalib gələrək fəxri kürsünün ən yüksək pilləsinə qalxdı. -100 kq çəki dərəcəsində mübarizə aparan cüdoçumuz həlledici görüşdə gürcüstanlı İlya Sulamanidzeyə qalib gələrək tarixi uğura imza atdı. Azərbaycan komandası yalnız Sidney-2000 və London-2012 Yay Olimpiya Oyunlarında iki qızıl medal qazanmağa müvəffəq olmuşdu.
Paris-2024-də növbəti medalı isə ölkəmizin aktivinə boksçu Alfonso Dominqes yazdırdı. 92 kq çəki dərəcəsində çıxış edən idmançmız Aybek Oralbaya (Qazaxıstan) qalib gələrək yarımfinala yüksəldi. O, bu nəticə ilə ən azı bürünc medalı özü üçün təmin etdi. Finala vəsiqə uğrunda yarışda idmançımızın rəqibi ispaniyalı Enmanuel Reyes Pla olacaq. A.Dominqes ardıcıl olaraq iki olimpiadada medal qazanan Azərbaycan idmançısı kimi tarixə düşdü.
Qadınlardan ibarət 3x3 basketbol millisi isə qazanılan uğurlu nəticələrin ardını gətirə bilmədi. Komandamız keçirdiyi hər iki oyunda məğlub oldu. Basketbolçularımız əvvəlcə Fransa yığmasına 10:15, ardınca isə Almaniyaya 8:12 hesabı ilə uduzdu. Komandamız sabah Avstraliya yığması ilə qarşılaşacaq.
