Azərbaycan Cüdo Federasiyası və Bakı Şəhər Gənclər və İdman İdarəsinin birgə təşkilatçılığı ilə dekabrın 20-22-də 18 yaşa qədər yeniyetmə cüdoçular arasında Bakı şəhər birinciliyi keçirilib.
Azərbaycan Cüdo Federasiyasının mətbuat xidmətindən verilən məlumata görə, Hövsan qəsəbəsində yerləşən Fövqəladə Hallar Nazirliyinin (FHN) İdman Sağlamlıq Mərkəzində keçirilən yarışda qızlar və oğlanlar arasında 16 çəki dərəcəsində mükafatçılar müəyyənləşib. 3 gün davam edən yarışda Bakının 61 müxtəlif klub, cəmiyyət və idman təşkilatından 798 cüdoçu gücünü sınayıb.
Yarışın sonuncu günü qızlar və oğlanlar arasında 4 çəkidə 98 cüdoçu medallar uğrunda mübarizə aparıb. Oğlanlar arasında -73 kq və +90 kq çəki dərəcələrində, qızlar arasında isə -44 kq və +70 kq çəki dərəcələrində qaliblər müəyyənləşib.
Yarışların son nəticəsinə görə, ümumi komanda hesabında medalların sayına görə birinci yerə Bakı şəhəri 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbi, ikinci yerə "Judo Club 2012" , üçüncü yerə isə "Çempion 74" İdman Klubu layiq görülüb. Birincilikdə ümumilikdə 18 komanda müxtəlif əyarlı medal qazanıb.
Yarışın əsas məqsədi yeniyetmələr və gənclər arasında idman vasitəsi ilə sağlam həyat tərzinin formlaşdırılması, həmçinin cüdonun kütləvi təbliğinə və təşviqinə nail olmaqdır. Turnir müvafiq yaş qrupu üzrə gələn il baş tutacaq Azərbaycan birinciliyinə seçim xarakteri daşıyır.
