MOK-da Avropa Kəndirlə Mübarizə Federasiyasının nümayəndə heyəti ilə görüş olub

Olimpizm xəbərləri

11.03.2025, 14:41

Martın 11-də Milli Olimpiya Komitəsinin (MOK) inzibati binasında Avropa Kəndirlə Mübarizə Federasiyasının (ETWF) nümayəndə heyəti ilə görüş olub. Görüşdə Milli Olimpiya Komitəsinin vitse-prezidenti Çingiz Hüseynzadə, MOK-un baş katibi Azər Əliyev, MOK-un idman idarəsinin müdiri Həsənağa Rzayev, Avropa Kəndirlə Mübarizə Federasiyasının (ETWF) prezidenti Ralf Brauninger, qurumun baş katibi Anders Andersson, Azərbaycan Kəndirlə Mübarizə İdmanı Cəmiyyəti İctimai Birliyinin İdarə Heyətinin sədri Elnur Şıxəliyev iştirak ediblər. MOK-un Baş katibi Azər Əliyev ölkəmizdə idmanın inkişafı istiqamətində görülən işlər və qazanılan uğurlar barədə qonaqlara ətraflı məlumat verib. O, bildirib ki, Milli Olimpiya Komitəsi Avropa Kəndirlə Mübarizə Federasiyasına ölkəmizdə bu idmanın inkişafı üçün lazımi dəstək göstərməyə hazırdır. Səmimi görüşə görə təşəkkürünü bildirən Avropa Kəndirlə Mübarizə Federasiyasının prezidenti almaniyalı Ralf Brauninger ölkəmizə səfəri barədə danışıb. Ralf Brauninger səfər çərçivəsində kəndirlə mübarizə idman növünün inkişafı üçün bir sıra görüşlərdə iştirak etdiyini qeyd edib. O, martın 9-da Abşeron Olimpiya İdman Kompleksində idmançılar, məşqçilər və hakimlər üçün seminar keçirildiyini qeyd edərək öz təcrübəsini yerli idmançılarla bölüşdüyünü bildirib. Ralf Brauninger həmçinin, iyun ayında Bakıda kəndirlə mübarizə idman növü üzrə Beynəlxalq səviyyəli "Turan Kuboku"nun keçirəcəyini bildirib. Görüş zamanı Azərbaycanda kəndirdartma idman növünün inkişafı istiqamətində görülən işlər, Avropa Kəndirlə Mübarizə Federasiyası ilə əməkdaşlıq imkanları və digər məsələlər müzakirə olunub. Görüşün sonunda xatirə şəkli çəkilib.