CEV prezidenti Bakıya səfərinin məqsədini açıqladı

Olimpizm xəbərləri

25.04.2025, 19:05

“Azərbaycan Yüksək Liqasının finalında maraqlı və keyfiyyətli oyunlar izlədik”. Bu sözləri kişi voleybolçular arasında Yüksək Liqanın final oyunlarından sonra jurnalistlərə açıqlamasında Avropa Voleybol Konfederasiyasının (CEV) prezidenti Roko Sikiriç deyib. O, Bakıya səfəri çərçivəsində keçirilən final qarşılaşmalarından böyük məmnunluqla ayrıldığını bildirib. CEV rəhbəri “Azərreyl” və “Murov Az Terminal” komandaları arasında keçirilən final matçlarını yüksək qiymətləndirərək qeyd edib ki, hər iki gündə təşkil olunan qarşılaşmalar olduqca maraqlı və yüksək səviyyəli olub: “Hər şey ideal idi. Burada məni çox gözəl qarşıladılar. Qonaqpərvərliyə gore minnətdarlığımı bildirirəm. Bakıda məhsuldar danışıqlar apardıq. Səfərimin əsas məqsədi növbəti layihələrin müzakirəsi idi. Biz çimərlik voleybolunun inkişafına da xüsusi önəm veririk. Bildiyiniz kimi, “Azərreyl” bu sahədə də uğurlar qazanıb”, - deyə o əlavə edib. Roko Sikiriç 2026-cı ildə voleybol üzrə Avropa çempionatının bir neçə qrup oyununun Bakıda keçiriləcəyini xatırladaraq, Azərbaycanın beynəlxalq turnirlərə ev sahibliyi etməyə tam hazır olduğunu vurğulayıb: “Azərbaycanın voleybol klubları Çempionlar Liqasında iştirak etməyə layiqdir. Ümid edirəm ki, gələcəkdə bu baş verəcək”, - deyə CEV prezidenti bildirib. Qeyd edək ki, “Azərreyl” finalda “Murov Az Terminal” üzərində 3:1 hesablı qələbə qazanaraq qızıl medallara layiq görülüb. "Murov Az Terminal" gümüş, "Xilasedici" isə bürünc medala sahib çıxıb.