AFFA beynəlxalq forumda interaktiv futbol zonası qurdu

Gündəm

18.05.2026, 18:18

Ümumdünya Şəhərsalma Forumunun 13-cü sessiyası çərçivəsində keçirilən “Urban Expo” sərgisində Azərbaycan Futbol Federasiyaları Assosiasiyası (AFFA) tərəfindən xüsusi futbol guşəsi təşkil olunub.

Olimpnews.az xəbər verir ki, “FIFA U-20 World Cup Azerbaijan & Uzbekistan 2027” şüarı ilə təqdim edilən stend tədbirə qatılan xarici qonaqların və nümayəndələrin diqqətini cəlb edib. Burada əsas diqqət idmanın sosial əhəmiyyətinə, gənclərin sağlam həyat tərzinə təşviqinə və inklüziv dəyərlərin təbliğinə yönəldilib.

Yaşıl dekorasiya ilə hazırlanmış interaktiv məkanda ziyarətçilər üçün mini futbol qapısı quraşdırılıb. İştirakçılar burada penalti zərbələri vuraraq həm əyləncəli vaxt keçirir, həm də Azərbaycanın futbol layihələri barədə məlumat əldə edirlər. Xüsusilə xarici nümayəndələr interaktiv oyun zonasına böyük maraq göstərirlər.

Xatırladaq ki, 2027-ci ildə təşkil olunacaq FIFA U-20 dünya çempionatı Azərbaycan və Özbəkistanın ortaq ev sahibliyi ilə baş tutacaq.