Çinin Nankin şəhərində keçirilən Yeniyetmələrin II Yay Olimpiya Oyunlarında iştirak edın Azərbaycanın yığma komandası avqustun 31-də Vətənə dönüb.
Heydər Əliyev Beynəlxalq Aeroportunda idmançıların təntənəli qarşılanması mərasimi olub.
Milli Olimpiya Komitəsi, Gənclər və İdman Nazirliyi, Bakı Şəhər Gənclər və İdman Baş İdarəsinin nümayəndələri, jurnalistlər, çoxsaylı azarkeşlər, qaliblərin doğmaları və yaxınları onları gül-çiçək dəstələri və musiqi ilə qarşılayıblar.
Gənclər və idman nazirinin müavini İsmayıl İsmayılov deyib ki, Olimpiya oyunlarında qazanılan 12 medal böyük nailiyyətdir. Bu nailiyyət Azərbaycan Prezidenti İlham Əliyevin idmana göstərdiyi diqqət və qayğının nəticəsidir. Biz Çində mübarizə aparan Azərbaycan idmançılarının hamısından medal gözləyirdik və onların buna potensial imkanları da var idi. Amma bu idmandır, qalibiyyət olduğu kimi, məğlubiyyət də olmalıdır. Mötəbər yarışda qazanılan bu uğura görə Azərbaycan xalqını təbrik edirəm.
Sərbəst güləş üzrə Olimpiya çempionu İqbal Hacızadə deyib: "Olimpiya oyunlarında iştirak etdiyim və Azərbaycan bayrağını yüksəklərə qaldırdığım üçün çox xoşbəxtəm. Gərgin görüşlər keçirdim və sonda istəyimə nail oldum. Bu mötəbər yarışa ciddi hazırlaşmışdım. Gərgin məşqlərim öz bəhrəsini verdi. Qələbəimi bütün Azərbaycan xalqına həsr edirəm”.
"Mən çox sevinirəm ki, Azərbaycanı yarışda layiqincə təmsil etdim. Bu yarışa ciddi hazırlaşmışdım və nəticədə qızıl medal qazandım. Final qarşılaşması çətin olsa da, bütün gücümü toplayıb rəqibi məğlub etdim və fəxri kürsünün ən yüksək pilləsinə qalxdım”, - deyə boks üzrə qızıl medalın sahibi Rüfət Hüseynov vurğulayıb.
Üç təkanla tullanma yarışlarında bürünc medal qazanan Nazim Babayev bildirib ki, qalib olmağı çox istəyirdim. Amma bürünc medal qazandım. Bundan sonra öz üzərimdə daha ciddi çalışaraq növbəti mötəbər yarışlarda qızıl medal qazanacağam. Medal qazanmağımda böyük əməyi olan məşqçilərimə öz təşəkkürümü bildirir və komanda yoldaşlarımı qazandıqları nailiyyətə görə təbrik edirəm.
İyirmi doqquz idman növü üzrə keçirilmiş yarışlarda 204 ölkədən 3888 idmançı iştirak edib.
Azərbaycan 9 idman növündən (avarçəkmə, cüdo, taekvondo, boks, sərbəst güləş, yunan–Roma güləşi, üzgüçülük, atletika, kamandan oxatma, güllə atıcılığı) 5 qızıl, 6 gümüş və 1 bürünc medal qazanıb. Bununla da 204 iştirakçı ölkə və medal qazanmış 86 ölkə arasında 10-cu yeri tutub. Avropa ölkələri arasında 6-cı, MDB-də Rusiya və Ukraynadan sonra 3-cü, İslam və Qafqaz ölkələri arasında 1-ci yerdədir. Yarışda iştirak edən 21 idmançıdan 12-si Vətənə medalla qayıdıb.
İdmançılarımızdan Səid Quliyev (73 kq) taekvondo, İslambek Dadov (69 kq) yunan-Roma, Rüfət Hüseynov (49 kq) boks, Teymur Məmmədov (63 kq) sərbəst güləş, İqbal Hacızadə (100 kq) sərbəst güləş üzrə qızıl medala sahib olublar.
II Yay Olimpiya Oyunlarında Leyla Əliyeva (44 kq) cüdo, Natiq Qurbanlı (55 kq) cüdo, Ceren Ozbek (44 kq) taekvondo, Baris Yotov avarçəkmə (1 nəfərlik qayıq), Cabbar Nəcəfov (50 kq) yunan-Roma güləşi, Leyla Qurbanova (52 kq) qadın güləşi üzrə gümüş medal, Nazim Babayev isə atletika (3 təkanla tullanma) üzrə bürünc medal qazanıblar.
Sinqapurda yeniyetmələrin Yeniyetmələrin I Yay Olimpiya Oyunlarına nəzər salsaq, bu oyunlarda Azərbaycan 5 idman növündə (ağır atletika, güləş, boks, cüdo, avarçəkmə) 12 nəfərdən ibarət komanda ilə təmsil olunmuşdur. Nəticədə 3 idman növündə (ağır atletika, güləş, boks) 5 qızıl və 3 gümüş medal qazanaraq komanda hesabında 204 ölkə arasında 11-ci yeri tutub.
