Tokio-2020: Cüdoçumuz medalın bir addımlığında

Tokio-2020: Cüdoçumuz medalın bir addımlığında

Tokio-2020-də cüdo yarışları sona yaxınlaşır. Fərdi yarışların son günündə daha iki cüdoçumuz tatami üzərinə çıxıb. Ağır çəkili cüdoçuların mübarizəsində kişilər arasında Uşangi Kokauri (+100 kq) qüvvəsini sınayıb. Yarışa 1/16 finaldan başlayan legioner idmançımız ilk görüşdə Polşa təmsilçisi Matsey Sarnaçki ilə qarşılaşıb. Rəqibinə ipponla məğlub edən U.Kokauri 1/8 finala vəsiqə qazanıb. Lakin idmançımız bu mərhələdə braziliyalı Rafael Silva ilə görüşdə uğurunu təkrarlaya bilməyib. Cüdoçumuz qızıl xal bölümündə rəqibinə məğlub olaraq Tokio-2020-də mübarizəni dayandırıb.

Cüdo yarışlarının son günündə daha bir ağır çəkili legioner cüdoçumuz mübarizəyə başlayıb. +78 kq çəki dərəcəsində gücünü sınayan İrina Kindzerska 1/8 finalda Larisa Tseriçlə (Bosniya və Herseqovina) üz-üzə gəlib. Rəqibinə ipponla qalib gələn xanım cüdoçumuz adını növbəti mərhələyə yazdırıb. Yarımfinala vəsiqə uğrunda görüşdə cüdoçumuz Cənubi Koreya təmsilçisi Min-Cin Hanla qarşılaşıb. Bu görüşü də təmiz qələbə ilə başa vuran İrina yarımfinala vəsiqəni təmin edib. İndi cüdoçumuzu medaldan cəmi bir qələbə ayırır. Finala çıxış uğrunda görüşdə cüdoçumuz güclü Yaponiya təmsilçisi Akira Sone ilə münasibətlərinə aydınlıq gətirəcək.