Polşada III Avropa Oyunları çərçivəsində keçirilən karate yarışlarına yekun vurulub. Yarışda 8 karateçi ilə təmsil olunan komandamız 2 qızıl və 1 bürünc medala sahib çıxıb. Qızıl medalları komandamıza Tural Ağalarzadə (67 kq) və İrina Zaretska (68 kq) qazandırıblar. Asiman Qurbanlı (84 kq-dan yuxarı) isə bürünc medalla kifayətlənib.
Karate yığmamız bu nəticə ilə ümumi medal sıralamasında ikinci yeri tutub. Kateçilərimizin III Avropa Oyunlarındakı uğurlu çıxışı ilə bağlı Azərbaycan Milli Karate Federasiyasının prezidenti Yaşar Bəşirovla əlaqə saxladıq. Federasiya prezidenti ilə müsahibəni oxucularımıza təqdim edirik.
- Yaşar müəllim, əvvəlcə Sizi karateçilərimizin III Avropa Oyunlarında qazandığı uğurlu nəticə münasibəti ilə təbrik edirik. Komandamız 3 medalla yarışları ikinci pillədə başa vurdu.
- Təbrikə görə çox sağ olun. Bu, Azərbaycan xalqının ümumi qələbəsidir. Karateçilərimiz hər zaman yüksək yerlər uğrundan yarışıblar. Bu dəfə də belə oldu. Azərbaycan komandasına ilk qızıl medalı karateçimiz Tural Ağalarzadə qazandırdı. Qeyd etdiyiniz kimi, komandamız iki qızıl və bir bürünc medalla ümumi hesabda ikinci yeri tutdu. Bu, 2019-cu ildə Belarusda təşkil olunan II Avropa Oyunlarındakı nəticədən daha yaxşıdır. Məlumat üçün qeyd edim ki, Belarusda komandamız dördüncü olmuşdu.
- Oyunlardan əvvəl “Olimpiya dünyası” qəzetinə verdiyiniz müsahibədə karateçilərimizin 3-4 medal qazanacağı proqnozlaşdırmışdınız. Nəticə elə dediyiniz kimi də oldu.
- Bəli, yadımdadır ki, sizə müsahibəmdə 3-4 medal qazanacağımızı bildirmişdim. Amma demişdim ki, qazanılan medallardan biri qızıl olacaq. Çünki yarışın səviyyəsi çox yüksək idi. Krakov-2023-ün karate yarışlarında ümumilikdə 33 ölkəni təmsil edən idmançılar mübarizə aparırdı. Bu ölkələrdən 22-si medalçılar sırasında yer aldı. Hər bir çəkidə Avropanın reytinq üzrə 8 ən güclü idmançısı iştirak edirdi. Təbii ki, hər bir idmançı çalışırdı ki, həmin yarışda uğurla iştirak edərək, öz ölkəsini yüksək səviyyədə təmsil etsin. Oyunlarda qazandığımız nəticəni yüksək dəyərləndirirəm. Tural Ağalarzadə və titullu idmançımız İrina Zaretska fəxri kürsünün ən yüksək pilləsinə qalxdı. Minsk-2019-un qalibi Asiman Qurbanlı isə bu dəfə bürünc medala sahib çıxdı. Bir sözlə, həmişə olduğu kimi, stabil idmançılarımız medal qazandılar. Onlar Avropa çempionatında olduğu kimi, bu yarışda da fərqləndilər. İstərdik ki, bundan sonra da hazırkı səviyyəmizi saxlayaq. Karatemiz hər zaman yüksəkdə olub və olacaq da. Çalışacağıq ki, hər zaman dövlətimizi yüksək səviyyədə təmsil edək.
- Yaşar müəllim, karate yarışlarının son günündə komandamızın üzvü Fəridə Əliyeva zədələnərək huşunu itirdi. Mümkünsə, idmançımızın hazırkı durumu barədə məlumat verərdiniz.
- Fəridənin zədəsi çox da ciddi deyil. Sadəcə olaraq onun burnunda əvvəldən zədəsi var idi. Bu yarışda isə italiyalı idmançı ilə görüşdə yenidən burnundan güclü zərbə aldı. Dərhal həkimə müraciət olundu. Ona yüksək səviyyədə qulluq etdilər. Hazırda hər şey qaydasındadır. İdmanda belə hallar olur. Çünki biz döyüş idman növləri ilə məşğul oluruq. Bu isə zədəsiz mümkün deyil. Mən özüm 1992-ci ildə qırıq qabırğa ilə Avropa çempionu olmuşdum. Bundan başqa 2006-cı ildə Moskvada ulduzlar yarışında iştirak edən zaman burnum qırılmışdı. Amma bununla belə mübarizə apardım. Yəni hər bir idmançının zədəsi olur. Çalışıb, özünü qorumalısan ki, zədələr az olsun.
- Bir qədər də Polşada idmançılarımıza dəstək barədə danışardınız.
- Azərbaycan nümayənde heyəti ilk gündən komandamızla bir yerdədir, bizimlə maraqlanır. Yarışları izləyənlər arasında Milli Olimpiya Komitəsinin və Azərbaycan Gənclər və İdman Nazirliyinin nümayəndələri də var idi. Xüsusən də MOK-un Baş katibi Azər Əliyev, gənclər və idman nazirinin müavini Mariana Vasileva da komandamızla bir yerdə oldu. Onlar ilk döyüşlərdən, final mübarizəsinə qədər idmançılarımızı dəstəklədilər. Bizə dəstək olan hər kəsə minnətdarlığımı bildirirəm.
- Mümkünsə III Avropa Oyunlarının təşkilatçılıq səviyyəsi barədə də məlumat verərdiniz. Mərkəzi avropalıların təşkil etdiyi Oyunlar sizin üçün nə ilə yadda qaldı?
- Polşada karate yarışları üzrə hər şey yüksək səviyyədə təşkil olunmuşdu. Heç bir problemlə üzləşmədik. Təşkilatçılığa görə minnətdarlığımı bildirirəm. Təbii ki, Krakov-2023 Bakıda keçirilən I Avropa Oyunları ilə eyni səviyyədə deyildi. Lakin ümumilikdə götürdükdə hər şey qaydasında idi. Bakı-2015-dəki təşkilatçılıq səviyyəsinə isə inanmıram ki, hansısa dövlət bir daha çata bilsin. Çünki Azərbaycanın Birinci vitse-prezidenti Mehriban xanım Əliyeva Təşkilat Komitəsinin sədri kimi, hər şeyi yüksək səviyyədə təşkil etmişdi. Cənab Prezidentimiz İlham Əliyevin də dəstəyi ilə bu yarış Olimpiya Oyunları səviyyəsində keçirilmişdi.
Azər Əlizadə
