Azərbaycanın ilk qadın idman ustası, Əməkdar artist, diktor Züleyxa Hacıyeva vəfat edib

Olimpiya dünyası

03.09.2026, 12:22

Azərbaycan idmanının və radio jurnalistikasının tanınmış simalarından biri, Azərbaycanın Əməkdar artisti, SSRİ idman ustası Züleyxa Hacıyeva vəfat edib.

Olimpnews.az xəbər verir ki, Azərbaycan idmanının, radio və televiziya məkanının inkişafında özünəməxsus iz qoymuş, uzun və mənalı ömür yolu keçmiş Züleyxa Hacıyeva sentyabrın 2-də, ömrünün 103-cü ilində dünyasını dəyişib.

Züleyxa Hacıbaba qızı Hacıyeva 23 avqust 1923-cü ildə anadan olub. Gənc yaşlarından gimnastika ilə məşğul olan Züleyxa Hacıyeva SSRİ idman ustası adına layiq görülüb. Azərbaycanın ilk qadın idman ustası 1941-1948-ci illərdə gimnastika üzrə yeddi dəfə Azərbaycan çempionu adını qazanıb. Züleyxa Hacıyeva sonradan “XX əsrdə Azərbaycanın 10 ən görkəmli idmançısı” sırasında yer alıb.

1948-ci ildə Azərbaycan Sənaye İnstitutunu bitirən Züleyxa Hacıyeva əmək fəaliyyətini də ictimai və idman sahələri ilə sıx bağlayıb. 1952–1955-ci illərdə Bakı Şəhər Bədən Tərbiyəsi və İdman Komitəsində sədr müavini vəzifəsində çalışıb.

Lakin Züleyxa Hacıyevanı Azərbaycan ictimaiyyətinə daha geniş tanıdan və sevdirən sahələrdən biri də radio olub. O, 1942-ci ildən 1992-ci ilədək – düz yarım əsr ərzində Azərbaycan radiosunun diktoru kimi fəaliyyət göstərib. Özünəməxsus səsi, peşəkarlığı, nitq mədəniyyəti və efir davranışı ilə dinləyicilərin rəğbətini qazanan Züleyxa Hacıyeva Azərbaycan radio məktəbinin formalaşmasında mühüm xidmətlər göstərib.

O, uzun illər ərzində radio efirində müxtəlif verilişlərin aparıcısı olub. “Səhər gimnastikası”, “Poeziya dəqiqələri”, “Axşamınız xeyir” və digər proqramlar onun məlahətli səsi və peşəkar təqdimatı ilə yaddaşlarda qalıb.

Züleyxa Hacıyevanın xidmətləri dövlət tərəfindən də yüksək qiymətləndirilib. 1979-cu ildə “Azərbaycan Respublikasının Əməkdar artisti” fəxri adına layiq görülüb. 2002-ci ildə isə Azərbaycan Respublikası Prezidentinin fərdi təqaüdçüsü olub.

Züleyxa Hacıyevanın əziz xatirəsi onu tanıyanların, onun səsini eşidərək böyüyən dinləyicilərin və Azərbaycan idmanının tarixini yaşadan insanların yaddaşında daim yaşayacaq.

Allah rəhmət eləsin!