Mariborda keçirilən XVII Avropa Gənclər Olimpiya Festivalı davam edir. Ötən gün Azərbaycan idmançıları da fstival çərçivəsində keçirilən müxtəlif idman növləri üzrə güclərini sınayıblar. İdmançılarımız festivalın üçüncü yarış günündə ilk medallarını qazanıblar. Komandamızın aktivinə medalları cüdoçularımız yazdırıblar. Hazırda Azərbaycan komandası 2 bürünc medalla 26-cı pillədə qərarlaşıb. 

Azərbaycan idmançılarının üçüncü yarış günündəki çıxışları barədə nəticələri təqdim edirik.

Cüdo

Ötən gün festivalın cüdo yarışlarına start verilib. Cüdo yarışlarının ilk günündə 3 cüdoçumuz tatami üzərinə çıxıb ki, onlardan da ikisi çıxışını bürünc medalla başa vurub.

Təmsilçilərimizdən ilk olaraq Nihad Məmişov (-50 kq) fəxri kürsüdə yer alıb. Mübarizəyə ermənistanlı Hayk Darbinyan üzərində qələbə ilə başlayan idmançımız növbəti mərhələdə Şota Baçaşvili (Gürcüstan) ilə qarşılaşıb. Təəssüf ki, idmançımız bu görüşdə rəqibinə uduzub. N.Məmişov üçüncü yer uğrunda görüşdə italiyalı Françesko Krokiani ilə qarşılaşıb. Gərgin mübarizə şəraitində keçən görüşdə rəqibinə qalib gələn Nihad Məmişov Maribor-2023-ün bürünc medalına sahib çıxıb.

Komandamıza digər bürünc medalı isə Ayxan Mirzəzadə (-55 kq) qazandırıb. O, 1/8 finalda isveçli cüdoçu Samir Pabloskiyə, növbəti mərhələdə isə niderlandlı Luka Riçardsona qalib gəlib. Lakin idmançımız yarımfinalda gürcüstanlı cüdoçu Merabi Samadaşviliyə məğlub olub. Yeniyetmə cüdoçumuz bürünc medal uğrunda görüşdə polşalı Yan Kolondraya qalib gələrək üçüncü yer sahib çıxıb.

Qızların mübarizəsində isə Məryəm Bayramzadə (-44 kq) çıxışını medalsız başa vurub. İlk görüşdə Böyük Britaniya təmsilçisi Eva Evinqə qalib gələn Məryəm növbəti mərhələdə belçikalı Lena Antoineyə məğlub olub. Mübarizəsini təsəlliverici görüşdə davam etdirən cüdoçumuz bu mərhələdə avstriyalı Tatevik Minasyanla qarşılaşıb. Təəssüf ki, idmançımız bu qarşılaşmada da məğlub olaraq yeddinci yerlə kifayətlənib.

Atletika

İyulun 24-də keçirilən yarışlarda atletikanın 400 metr məsafəyə maneələrlə qaçış yarışlarında Ləman İsfəndiyarova mübarizəyə başlayıb. Təmsilçimiz Ukrayna, Fransa, Almaniya, Finlandiya, Yunanıstan və Sloveniyadan olan idmançılarla yarışıb. Təsnifat mərhələsinə vəsiqə qazamaq üçün idmançımızın cəhdi uğursuz olub. Belə ki, Ləman İsfəndiyarova 1:16,36 göstərici ilə yarışı sonuncu pillədə başa vurub. Bu məsafədə ukraynalı Maşa Maşanienkova (57,49), fransalı Meta Tumba (58,30) və almaniyalı Emma Kaul (59,87) finişə müvafiq olaraq ilk üçlükdə çatıb.

Velosiped (qızlar)

Azərbaycanlı idmançılar velosiped idman növündə 10 km məsafəyə fərdi ötüşmə yarışlarında qüvvələrini sınayıblar. Maribor şəhər mərkəzində təşkil olunan yarışlarda əvvəlcə qızlar öz bacarığını nümayiş etdiriblər. Təmsilçilərimizdən ən yaxşı nəticə Məryam Əfqanzadəyə məxsus olub. O, yarışları 52-ci yerdə tamamlayıb - 00:15:55,17. Ayan Məmmədzadə (00:16:44,13)- 71-ci, Xədicə Nabatzadə (00:17:43,71) isə 79-cu olub.

Bu məsafədə müvafiq olaraq niderlandlı Meqan Arens (00:14:24,66), britaniyalı Erin Butman (00:14:27,42) və digər niderlandlı Yente Kups (00:14:30,61) ilk üçlükdə yer alıblar.

Şose velosipedi (oğlanlar)

Şose velosipedi idman növündə 10 km məsafəyə fərdi ötüşmə yarışlarında oğlanların yarışı da gərgin mübarizə şəraitində keçib. Velosipedçilərimizdən Artyom Proskuryakov finişə 59-cu pillədə çatıb - 00:14:04,95.

Ravi Rzayev yarışları 81-ci (00:14:37,98), Turqut Qurbanlı isə 84-cü (00:15:27,98) pillədə yekunlaşdırıb. Bu yarışlarda niderlandlı Giys Şonvelde (00:12:52,89), irlandiyalı Konor Mörfi (00:12:55,38) və almaniyalı Maksimilan Benz (00:13:01,42) Maribor-2023-ün medallarına yiyələniblər.

İdman gimnastikası

İdman gimnastikasının dayaqla tullanma yarışlarında iştirak edən Aydın Əlizadənin mükafat qazanmaq cəhdi uğursuz olub. Gənc idmançımızyekunda (11.800) 52-ci yerlə kifayətlənib.