“İnanıram ki, Paris Olimpiadasında da qələbəmin davamını gətirəcəyəm”

Olimpizm xəbərləri

07.04.2024, 18:57

"Bütün azarkeşlərə öz minnətdarlığımı bildirirəm - istər tribuna qarşısında olsun, istərsə də televiziya. Doğma divarlar arasında güləşmək həqiqətən də ayrı hissdir. İdmançıya böyük motivasiya verir. Yarışa güclü hazırlaşmışdıq. Bunun üçün Cəbrayıl və Xetaq müəllimə təşəkkür edirəm”.

Bu sözləri Bakıda keçirilən Avropa Olimpiya Təsnifat turnirində finala yüksələrək Paris-2024 Yay Olimpiya Oyunlarına lisenziya qazanan sərbəst güləşçimiz Əliabbas Rzazadə jurnalistlərə açıqlamasında deyib.

Avropa çempionumuz Paris Olimpiadasında ona olan ümidləri doğrultmağa çalışacağını bildirib. “Qarşıma məqsəd qoydum. Allaha şükürlər olsun ki, Olimpiya oyunlarına lisenziyanı təmin etdim. Qarşıda məni daha çətin sınaq gözləyir. İnanıram ki, belə güləşib Paris Olimpiadasında da qələbəmin davamını gətirəcəyəm. Bu gün finallada döşəyə çıxan ilk mən oldum. Allahın köməkliyi ilə ayağım düşərli olar, digər 4 komanda yoldaşım da Olimpiya Oyunlarına vəsiqə qazanar", - deyə Əliabbas Rzazadə bildirib.

Qeyd edək ki, Əliabbas Rzazadə Bakıda keçirilən güləş üzrə Avropa Olimpiya Təsnifat turnirində ardıcıl olaraq, təsnifat mərhələsində italiyalı Simone Piroddu, 1/4 finalda türkiyəli Süleyman Atlını, yarımfinala isə Şimali Makedoniya təmsilçisi Vladimir Yeqorovu məğlub edərək Paris-2024 Yay Olimpiya Oyunlarına lisenziya qazanıb.