"Ölkəmizdə ulu öndər Heydər Əliyevin 101 illiyi çərçivəsində bir çox tədbirlər həyata keçirilir. Təqdirəlayiq haldır ki, Azərbaycan Kanoe və Avarçəkmə Federasiyası da tədbirlərin keçirilməsinə yüksək səviyyədə qoşulub".
Bu sözləri Milli Məclisin sədrinin birinci müavini Əli Hüseynli avarçəkmə üzrə “Prezident Kuboku 2024” beynəlxalq reqatasının üçüncü günündə jurnalistlərə açıqlamasında deyib.
Hər il ənənəvi yarışda iştirakçı ölkələrin sayının artdığını deyən Ə.Hüseynli bu dəfəki yarışda da rekord sayda idmançının iştirak etdiyini qeyd edib.
"Hər il olduğu kimi, tədbir işğaldan azad olunmuş Suqovuşanda başlayır. Bu, simvolik məna daşıyır. Bildiyiniz kimi ilk tədbirdə Azərbaycan Prezidenti İlham Əliyev və Birinci vitse-prezident Mehriban xanım Əliyeva iştirak etmişdi.
Digər qürurverici hal ondan ibarətdir ki, yığma komandanın üzvü Paris Olimpiadasına lisenziya əldə edib. Ümid edirik ki, bu olimpiadada da idmançılarımız uğurlu nəticə qazanacaqlar. Sözsüz ki, bu yarış ölkəmizin ictimai həyatı üçün mühüm əhəmiyyət kəsb edir. Bizim üçün bu, həm də ona görə qürurvericidir ki, tədbir Azərbaycanın regionlarında, Suqovuşanda, Mingəçevirdə keçirilir. Paytaxt və böyük şəhərlərimizdə, habelə işğaldan azad olunmuş Qarabağda belə tədbirlərin keçirilməsi Azərbaycanda idman və gənclər siyasətinin uğurunun göstəricisidir. Əminik ki, Azərbaycan idmançıları bu uğurları ilə ölkə ictimaiyyətini sevindirəcəklər", - deyə Əli Hüseynli bildirib.
