Qəbələdə 5 Mart - Bədən Tərbiyəsi və İdman Günü münasibətilə parad təşkil olundu

Olimpizm xəbərləri

05.03.2025, 14:14

“İdman paytaxtı” Qəbələdə 5 Mart - Bədən Tərbiyəsi və İdman Günü münasibətilə parad təşkil edilib.

Paradda müxtəlif idman federasiyalarının nümayəndələri, Olimpiya, Paralimpiya çempionları, idman səfirləri, könüllülər, Milli Antidopinq Agentliyi, Azərbaycan İdman Akademiyasının tələbələri və idman ictimaiyyətinin nümayəndələri iştirak ediblər. Fövqəladə Hallar Nazirliyinin önündən başlayan parad Qəbələ regional “ASAN xidmət” mərkəzinin qarşısında başa çatıb.

Paraddan sonra Azərbaycanın Dövlət Himni səsləndirilib.

Qəbələ Rayon İcra Hakimiyyətinin başçısı Səbuhi Abdullayev Bədən Tərbiyəsi və İdman Gününün hər il ölkədə, o cümlədən bölgələrdə təntənəli şəkildə qeyd edildiyini vurğulayıb. O, Prezident İlham Əliyevin daim Azərbaycan idmanına, gənclərə qayğı göstərdiyini bildirib. S.Abdullayevin sözlərinə görə, bölgələrdə hər il yeni idman infrastrukturları inşa olunur. İcra başçısı Qəbələ şəhərinin sürətlə inkişaf etdiyini söyləyib.

Gənclər və idman naziri Fərid Qayıbov Qəbələnin bu gün əsl bayram ab-havasında olduğunu bildirib: “Otuz il öncə Ümummilli Lider Heydər Əliyevin idman ictimaiyyəti ilə tarixi görüşü olmuşdu. Biz, həm də bu əlamətdar hadisənin 30-cu ildönümü ilə bağlı Qəbələ şəhərinə təşrif buyurmuşuq. Bu münasibətlə hazırlanan “Dönüş Anı” sənədli filmini izlədik. Azərbaycanda idman yüksək səviyyədə inkişaf edir”.

Tədbir konsert proqramı ilə davam edib.