Azərbaycan Cüdo Federasiyası daxili yarış sisteminə yenilik gətirib. Belə ki, federasiyasının təşkilatçılığı ilə cüdo liqaları yaradılıb.

Üç yaş qrupu üzrə keçiriləcək yeni liqa sistemi U-14, U-17 və böyüklər yaş qruplarını əhatə edəcək. U-14 və U-17 kateqoriyalarında həm oğlan, həm də qız cüdoçular, böyüklər liqasında isə yalnız kişilər mübarizə aparacaqlar.

Yaradılan yeni liqa sistemi idmançıların reytinqinə birbaşa təsir edəcək. Bu model həm milli komandanın heyətinin seçilməsində, həm də bölgələr arasında rəqabətin artmasında mühüm rol oynayacaq.

Azərbaycan Cüdo Federasiyasının baş katibinin müavini və idman direktoru Kamran Talıbov yeni sistemlə bağlı keçirilən mətbuat konfransında danışarkən qeyd edib ki, liqaların əsas məqsədi bütün idmançılara bərabər imkanların yaradılması, daxili yarışlar arasında münasibətlərin birləşdirilməsi, idmançıların və məşqçilərin maddi olaraq dəstəklənməsi, eləcə də klubların infrastrukturunun yaxşılaşdırılmasıdır.

“Liqa yarışları açıq status daşıyacaq və və şərtlərə cavab verən bütün cüdoçular iştirak edə biləcək. Böyülər liqasında üç, U-14 və U-17 liqalarında isə dörd yarışın keçirilməsi nəzərdə tutulur. Cüdo liqaları milli komandalara seçim meyarlarından birini təşkil edəcək. Yığmaların heyəti yalnız Azərbaycan çempionatı və birincilikləri əsasında deyil, il boyu keçirilən bütün daxili yarışlarda, eləcə də liqalarda toplanacaq reytinq xalları əsasında müəyyən ediləcək. Bu, idmançıları ilboyu keçirilən daxili yarışlarda aktiv iştirak etməyə stimullaşdırmaqla bərabər, seçimin də daha obyektiv olmasını şərtləndirəcək. Bir sözlə, liqalarda toplanan xallar milli komandanın formalaşmasına təsir edəcək. Bununla yanaşı, həm məşqçilər, həm də klublar üçün ayrıca mükafat sistemi tətbiq olunacaq”, - deyə Kamran Talıbov bildirib.

Federasiya rəsmisi liqaların başlanma tarixi barədə də məlumat verib. Bildirilib ki, aprelin 19-20-də U-14, 21-22-də U-17, may ayında isə böyüklər arasında liqalara start veriləcək. Yarışlar Abşeron Olimpiya İdman Kompleksində keçiriləcək.

Kamran Talıbov vurğulayıb ki, bu sistem bölgələrdəki UGİM-lərin fəaliyyətini də stimullaşdıracaq. “Bakı və Sumqayıtdan sonra qərb, şimal-qərb və aran zonaları cüdonun inkişafında önə çıxan bölgələr kimi qiymətləndirilir. Bu, bölgələrdə cüdonun inkişafına da müsbət təsir göstərəcək. Qeyd edim ki, liqalarda iştirak etmək sərbəstdir, lakin yığmaya düşmək üçün keyfiyyət həlledici olacaq”, - deyə Kamran Talıbov bildirib.

Mətbuat konfransının sonunda jurnalistlərin sualları cavablandırılıb.

Azər Əlizadə