Beynəlxalq arenada növbəti uğur

Cüdo

11.05.2026, 10:03

Mayın 9-10-da Gürcüstanın Qori şəhərində cüdo üzrə böyüklər arasında Avropa Kuboku keçirilib.

Olimpnews.az xəbər verir ki, yarış “Judo Club 2012”nin idmançıları üçün uğurlu alınıb. Klubun təmsilçiləri yarışda 1 qızıl və 2 bürünc medal qazanıblar. -66 kq çəki dərəcəsində çıxış edən İslam Rəhimov bütün rəqiblərini məğlub edərək qızıl medala layiq görülüb. Mübarizəyə 1/8 finaldan başlayan cüdoçumuz ardıcıl olaraq gürcüstanlı cüdoçular Rapava Aleksandre və Tornike Maziaşvilini üstələyərək yarımfinala yüksəlib. Bu mərhələdə komanda yoldaşı Nizami İmranova da qalib gələn İslam Rəhimov finalda daha bir azərbaycanlı cüdoçu Elşən Əsədovla qarşılaşıb. 7 dəqiqə 9 saniyə davam edən həlledici görüşdə qələbə qazanan cüdoçumuz qızıl medala layiq görülüb.

Bürünc medalları isə klubun aktivinə Babarəhim Mirzəyev (-60 kq) və Rüfət Şövlətov (+73 kq) yazdırıb.

Qeyd edək ki, Avropa Kubokunun yekununda Azərbaycan milli komandası 2 qızıl, 1 gümüş və 6 bürünc medal qazanaraq ümumi komanda hesabında üçüncü, kişilər arasında isə ikinci yeri tutub.