"Xüsusi olimpiya birləşmiş futbol dünya kuboku"nun açılış mərasimi keçirilib

$\"Xüsusi olimpiya birləşmiş futbol dünya kuboku\"nun açılış mərasimi keçirilib$

Olimpiya dünyası

07.07.2026, 13:51

Fransanın paytaxtı Parisdə keçirilən "Xüsusi olimpiya birləşmiş futbol dünya kuboku"nun rəsmi açılış mərasimi baş tutub.

Bu barədə Xüsusi Olimpiya Komitəsindən bildirilib.

Açılış mərasiminin ən yaddaqalan anlarından biri idmançıların paradı olub. Parad zamanı 23 ölkəni təmsil edən 324 futbolçu Şarleti stadionunda yürüş edərək yüzlərlə azarkeş, ailə üzvləri, fəxri qonaqlar, dövlət nümayəndələri, könüllülər və turnirin dəstəkçiləri tərəfindən qarşılanıb.

Açılış mərasimi başa çatdıqdan sonra diqqət futbol oyunlarına yönəlib. Azərbaycan turnirdə qadınlardan ibarət "Birləşmiş Futbol" (Unified Football) komandası ilə təmsil olunur. 11 nəfərdən ibarət yığma B qrupunda Namibiya, ABŞ və Qvatemala ilə mübarizə aparacaq.

Qeyd edək ki, iyulun 11-nə qədər davam edəcək turnirdə 23 ölkədən 24 komanda – 12 kişi və 12 qadın komandası mübarizə aparır. Yarış inklüziv idmanın inkişafına töhfə vermək, bərabər imkanların təşviqi və sosial inteqrasiyanın gücləndirilməsi məqsədi daşıyır.