Lui van Qal xərçəngə qalib gəldi

Futbol

07.08.2026, 12:45

Əfsanəvi niderlandlı baş məşqçi Lui van Qal prostat xərçənginə qalib gəldiyini açıqlayıb.

Olimpnews.az xəbər verir ki, 73 yaşlı mütəxəssis 2022-ci ildə Niderland milli komandasını Qətərdə keçirilən dünya çempionatına hazırladığı dövrdə prostat xərçənginin aqressiv formasından əziyyət çəkdiyini ictimaiyyətə bildirmişdi. O, xəstəliyə baxmayaraq, həmin müddətdə komandasını çalışdırmağa davam etmişdi.

Lui van Qal son açıqlamasında artıq xərçəngə qalib gəldiyini təsdiqləyib. Təcrübəli mütəxəssis bildirib ki, üç il davam edən radioterapiya kursu, böyrək infeksiyalarının müalicəsi və prostat vəzində aparılan əməliyyatdan sonra səhhətində ciddi irəliləyiş əldə olunub.

Van Qal sağlamlığındakı müsbət dəyişikliklərdən danışarkən, müalicənin müəyyən fəsadlarının qaldığını da gizlətməyib.

Qeyd edək ki, Lui van Qal məşqçilik karyerası ərzində "Ayaks", "Barselona", AZ, "Bavariya", "Mançester Yunayted" və Niderland milli komandasında çalışıb. O, dünya futbolunun ən titullu və nüfuzlu mütəxəssislərindən biri hesab olunur.