Taekvondo üzrə yığma komandanın məşqçisi, qadınlardan ibarət milli komandanın baş məşqçisi Elnur Amanov “Olimpiya dünyası” qəzetinə müsahibə verib. Təcrübəli mütəxəssis taekvondo üzrə yığmamızın açıq havada keçirilən məşqlərindən, komandamızın hazırki vəziyyətindən və bir sıra məsələlərdən danışdı. Həmin müsahibəni oxucularımıza təqdim edirik.

- Elnur müəllim, açıq havada məşqlərə icazə verildikdən sonra Azərbaycanın Olimpiya idman növləri üzrə bəzi milli komandaları artıq hazırlığa başlayıblar. Taekvondo Federasiyasında vəziyyət necədir?

- Biz də digər federasiyalar kimi, karantin rejiminin yumşaldılmasından sonra açıq havada yüngül məşqlərə başlamışıq. Məşqlərimizi əsasən, Heydər Əliyev Mərkəzinin ərazisində qaydalar çərçivəsində keçirik. Bu məşqlər əsasən idmançıların formadan tam düşməməsi üçündür. Məşqlər əsasən qaçış və müəyyən idman hərəkətlərindən ibarətdir. Təbii ki, belə bir məşq prosesi ilə idmançı öz gücünü, fiziki hazırlığını tam şəkildə qoruya bilməz. Bunun üçün onlara fiziki, taktiki və texniki hazırlıqlar lazımdır.

- Aydın məsələdir ki, idman zallarındakı məşqlərlə açıq havadakı məşqlərin effekti eyni olmur. Bu baxımdan yığma komandanın məşqçisi kimi açıq havada keçirilən məşqlərin əhəmiyyətini necə qiymətləndirirsiniz?

- Düzünü desəm, açıq havada məşq etmək peşəkar idmançı üçün çətindir. İdmançıların paltarlarını dəyişməyə yeri olmur və onlar məşqdən sonra yuyuna bilmirlər. Bu da peşkar idmançı və yığma komanda üçün bir az çətinlik yaradır. Bundan əlavə idman zallarında lazımi məşq avadanlıqları var ki, idmançılar onlardan istifadə edirlər. Açıq havada isə bu şəraiti qurmaq o qədər də mümkün deyil. Ümid edirik ki, tezliklə idman zalları açılacaq və idmançılar normal məşqlərinə geri dönəcəklər. Hələ ki, karantin rejiminin daha da yumşaldılmasını və normal məşqlərimizə geri qayıdacağımız günü səbirsizliklə gözləyirik.

- Yığma komandanın əsas üzvləri necə, məşqlərdə iştirak edirlər?

- Komandamızın üzvlərindən yarıdan çoxu bizimlə məşq etmir. Millinin əsas aparıcı simaları sayılan Milad Beigi Herçəqani, Radik İsayev və digər idmançılarımız Azərbaycanda deyil. Onlar öz ölkələrindədirlər. Bəzi idmançılar isə rayondadırlar.

- Komandamız üçün ən yaxın yarışın tarixi nə vaxtdır?

- İlin sonunadək taekvondoçularımızı heç bir yarış gözləmir. Bir müddət əvvəl Dünya Taekvondo Federasiyasının onlayn iclası oldu. Beynəlxalq qurumdan ölkələrin federasiyalarına bildirilib ki, gələn ilin əvvəlindən turnirlərin keçirilməsi gözlənilir. Təqvimdə yeganə yarış kimi, dekabr ayında Çində keçirilməsi gözlənilən Böyük Dəbilqə turniri qalmışdı ki, o da ləğv olunub. Yəni bu il taekvondoçularımız heç bir yarışda iştirak etməyəcək. Məşqlər tam şəkildə bərpa olunduqdan sonra gələn ilin ilk yarışına kimi idmançılarımız öz fiziki hazırlıqlarını bərpa edə biləcəklər.

- Elnur müəllim, hər il gənclərdən ibarət yığma komandadan əsas komandaya yetərincə istedadlı idmançılar cəlb olunur. Bəs, pandemiya şəraitində bu proses necə tənzimlənəcək? həmin idmançıların aqibəti necə olacaq?

- Bu il gənclərdən ibarət yığma komandamızın heyətində çox istedadlı idmançılar var idi. Məşqçilər heyəti həqiqətən də onlardan yüksək nəticələr gözləyirdi. Bildiyiniz kimi, pandemiya ilə əlaqədar olaraq Bolqarıstanda keçirilməsi gözlənilən gənclər arasında dünya birinciliyi təxirə salındı. Bu yarış gənclərdən ibarət yığma komandanın heyətində sonuncu ili olan idmançılar və onların məşqçiləri üçün çox əhəmiyyətli idi. Nə demək olar. Çox təəssüfləndirici bir haldır. Çünki o, gənclərin arasında bu il dünya çempionu və mükafatçısı ola biləcək idmançılar var idi. Amma bu bir qismətdir. Təbii ki, nə olursa-olsun, ruhdan düşmək olmaz. Həmin idmançıların karyeraları hələ qarşıdadır. Mən bir məşqçi kimi həmin gənclərə səbrli, dözümlü və iradəli olmağı tövsiyə edirəm.

- Sizcə, bir neçə ay ərzində ev şəraitində məşq etmək idmançıların hazırlıq səviyyəsinə nə dərəcədə təsir göstərdi?

- Peşəkar idmançı üçün evdə oturmaq və evdə məşq etmək təbii ki, çox çətindir. Həm bədənin forması, həm də artıq çəki baxımdan problem yaranacaq. Düzdür, bəziləri buna peşəkar yanaşıb, öz çəkisini qoruya bildi. İdmançı üçün çəkinin 3-4 kq artıq olması o qədər də problem deyil. Komandanın həkimi də idmançılarla əlaqə saxlayır, onlara bu barədə zəruri məsləhətlərini verir.