Tokio Yay Olimpiya Oyunlarına hazırlığını davam etdirən kişi boksçularımız Bakıdakı təlim-məşq toplanışını başa vurduqdan sonra İtaliyaya yollanıb. Azərbaycan Boks Federasiyasından verilən məlumata görə, iyunda Avropa Olimpiya təsnifat turniri bitdikdən sonra davam etdirilən hazırlığın son mərhələsi İtaliyada yekunlaşacaq.
Tokio-2020-yə lisenziya qazanan Tayfur Əliyev (57 kq), Cavid Çələbiyev (63 kq), Lorenzo Sotomayor (69 kq), Alfonso Dominqes (81 kq) və Məhəmməd Abdullayevin (91 kq-dan yuxarı) heyətində yer aldığı komandamız hazırda İtaliyanın Assizi şəhərinədə hazırlıq keçir. Beynəlxalq təlim-məşq toplanışında Umberto Orta Dominqesin baş məşqçisi olduğu komandamızla yanaşı, 10-dək ölkənin boksçuları iştirak edirlər. Onların arasında İtaliya, Fransa, Dominikan Respublikası, Hindistan, Kanada və digərləri var.
Boksçularımız Assizidə əsasən, fiziki və taktiki hazırlıq üzərində işləyəcəklər. Toplanışın son mərhələsində sınaq görüşlərinin olması da planlaşdırılır. Yığmamız iyulun 18-dək İtaliyada hazırlıq keçəcək və oradan Olimpiadanın təşkil olunacağı Tokioya yollanacaq.
Qeyd edək ki, Tokio Olimpiadasının boks yarışları iyulun 24-də start götürəcək və avqustun 8-də bitəcək. Qarşılaşmalar “Ryoqoku Kokuqikan” İdman Sarayında keçiriləcək.
