Nazir Azərbaycan Turizm Agentlikləri Assosiasiyası İdarə Heyətinin sədri ilə görüşüb

Olimpizm xəbərləri

16.11.2022, 14:22

Noyabrın 16-da gənclər və idman naziri Fərid Qayıbov Azərbaycan Turizm Agentlikləri Assosiasiyası İdarə Heyətinin sədri Göydəniz Qəhrəmanovla görüşüb. Gənclər və İdman Nazirliyinin mətbuat xidmətindən verilən məlumata görə, görüşdə turizm sahəsində əlaqələrin inkişafı və qarşılıqlı əməkdaşlıq imkanlarının genişləndirilməsi məsələləri müzakirə olunub.

F.Qayıbov nazirliyin tabeliyində olan şimal, cənub, şərq və qərb regionlarında fəaliyyət göstərən idman kompleksləri, burada mövcud olan hotel, kotec, hostel tipli obyektlər və yaradılan infrastruktur haqqında məlumat verib. Nazir regionlardakı bir sıra komplekslərin ərazisində mövcud olan yerləşdirmə obyektlərində təmir-bərpa və infrastruktur işlərinin aparıldığını da qeyd edib.

Görüşdə G.Qəhrəmanov Assosiasiyanın fəaliyyəti haqqında məlumat verərək qurumun dövlət-özəl sektor arasında qarşılıqlı işbirliyinin qurulmasında və tərəfdaşlıq əlaqələrinin artırılmasında maraqlı olduğunu bildirib. Assosiasiyanın rəhbəri regionlarda yerləşən komplekslərin turistlərin yerləşdirilməsi baxımından potensialını yüksək qiymətləndirərək bu istiqamətdə birgə fəaliyyətin regional turizmin inkişafına töhfə verəcəyini vurğulayıb.

Görüş çərçivəsində tərəfdaşlıq əlaqələrinin gücləndirilməsi, kommunikasiya əlaqələrinin genişləndirilməsi, ölkədə keçirilən beynəlxalq idman tədbirlərinin təşkilində birgə əməkdaşlıq və təcrübə mübadiləsinin aparılması məsələləri müzakirə edilib.