Daşkənddə qalib gələn boksçunun qazancı açıqlandı

Daşkənddə qalib gələn boksçunun qazancı açıqlandı

Aprelin 30-dan mayın 14-dək Özbəkistanın paytaxtı Daşkənddə kişilər arasında keçiriləcək boks üzrə dünya çempionatının mükafat fondu açıqlanıb. Beynəlxalq Boks Assosiasiyasının (IBA) rəsmi saytında yer alan xəbərə görə medalçılar üçün ümumilikdə 5,2 milyon dollar məbləğ ayrılıb. Bildirilib ki, mundialda çıxış edəcək boksçular arasında yeddi dünya çempionu da olacaq. Onlardan biri isə Azərbaycan millisinin üzvü Alfonso Domingesdir.

Dünya çempionatının qaliblərinin hər birinə 200 min dollar veriləcək. İkinci yeri tutanlar 100 min, bürünc medal qazananlar isə 50 min dollarlıq gəlir əldə edəcəklər. Boksçular ümumilikdə 13 çəki dərəcəsində mübarizə aparacaqlar.

Qeyd edək ki, Alfonso Dominges 2021-ci ildə Serbiyanın paytaxtı Belqradda dünya çempionu olub. 28 yaşlı boksçu Tokio-2020 Yay Olimpiya Oyunlarının bürünc mükafatçısıdır.