Əməkdar jurnalist Murad Fərzəliyevin 60 illik yubileyi qeyd olunub

Olimpizm xəbərləri

13.10.2023, 15:30

Oktyabrın 12-də Milli Olimpiya Komitəsinin (MOK) mətbuat katibi, “Olimpiya dünyası” qəzetinin baş redaktoru, “Tərəqqi” medallı Əməkdar jurnalist Murad Fərzəliyevin 60 illik yubileyi qeyd olunub. Bakı Əyləncə Mərkəzində keçirilən tədbirdə Milli Olimpiya Komitəsinin vitse-prezidenti Çingiz Hüseynzadə, Azərbaycan Milli Olimpiya Komitəsinin Ədalətli Oyunlar Komissiyasının (AzƏOK) sədri Xəzər İsayev, Azərbaycan Dövlət Bədən Tərbiyəsi və İdman Akademiyasının idman işləri üzrə prorektoru, Olimpiya çempionu Fərid Mansurov, "Zenit” Bədən Tərbiyəsi və İdman Cəmiyyəti İctimai Birliyinin sədri Fazil Hadıbəyov, Olimpiya kateqoriyalı hakim, "Qızıl Fit” mükafatının sahibi Hicran Şərifov, idman ictimaiyyətinin tanınmış nümayəndələri, şairlər, yubilyarın yaxınları və dostları iştirak ediblər. Əvvəlcə ölkəmizin ərazi bütövlüyünün müdafiəsi zamanı canını qurban verən şəhidlərin xatirəsi birdəqiqəlik sükutla yad olunub. Tədbirdə çıxış edən Əməkdar jurnalistin anası Gülruz xanım övladını təbrik edərək, ürək sözlərini bildirib. MOK-un vitse-prezidenti Çingiz Hüseynzadə isə M.Fərzəliyevi Milli Olimpiya Komitəsinin kollektivi adından təbrik edərək, onun ölkə mətbuatının inkişafındakı xidmətlərindən söz açıb. M.Fərzəliyevin istedadlı qələm sahibi olduğunu deyən AzƏOK-un sədri Xəzər İsayev isə Əməkdar jurnalisti təbrik edərək, ona uzun ömür, can sağlığı və yorulmaz fəaliyyətində uğurlar arzulayıb. Olimpiya çempionu Fərid Mansurov Murad Fərzəliyevlə bir sıra yarışlarda yol yoldaşı olduğunu deyərək, yubilyarın yüksək insani keyfiyyətlərindən bəhs edib. Sonra çıxış edən şair Dayandur Sevgin Murad Fərzəliyevin təkcə jurnalist kimi deyil, həm də şair kimi gözəl şeirlərin müəllifi olduğunu bildirərək, yubilyara Azərbaycan Yazıçılar Birliyinin Fəxri diplomunu təqdim edib. Tədbirdə çıxış edən idman ictimaiyyətinin nümayəndələri, Murad Fərzəliyevin keçmiş tələbə yoldaşları, onun yaxın dostları, həmkarları çıxış edərək, Əməkdar jurnalistin, publisist, şair və redaktor kimi yaradıcılıq məziyyətlərindən söhbət açıblar. Sonda çıxış edən Murad Fərzəliyev tədbir iştirakçılarına minnətdarlığını bildirib. Tədbirdə həmçinin yubilyarın yeni çapdan çıxan “Mən hər gün günəşi qarşılayıram” adlı şeirlər kitabı iştirakçılara paylanılıb.