"Üçüncü ildir ki, ümumilli lider Heydər Əliyevin xatirəsinə həsr olunmuş avarçəkmə üzrə "Prezident Kuboku" beynəlxalq reqatası keçirilir".
Bu sözləri Gənclər və İdman Nazirliyinin idman şöbəsinin müdiri Elnur Məmmədov "Prezident Kuboku-2024" reqatasının ilk yarış günündə jurnalistlərə müsahibəsində deyib.
İkinci ildir ki, yarışın beynəlxalq federasiyanın rəsmi təqviminə salındığını qeyd edən Elnur Məmmədov bu dəfəki yarışda 21 ölkədən 30 komandanın iştirak etdiyini vurğulayıb. "Budəfəki yarışda iştirakçı sayına görə yeni rekord qeydə alındı. Bu da onu göstərir ki, ulu öndərin xatirəsinə həsr olunmuş turnirin iştirakçıları ildən-ilə daha da artır.
Ötən ilin sentyabr ayında Ali Baş Komandan İlham Əliyevin rəhbərliyi altında keçirilən lokal xarakterli antiterror əməliyyatı nəticəsində ölkəmizin suverenliyi tam bərpa olundu. Biz artıq bu il bu yarışda tam başqa bir sevinclə, qürurla iştirak edirik.
Azərbaycan Kanoe və Avarçəkmə Federasiyasına minnətdarlığımızı bildiririk ki, belə bir yarış təşkil etdi. Onlar son illərdə böyük işlər həyata keçirirlər. Avarçəkmə texniki idman növüdür. Bildiyiniz kimi burada yarış üçün şəraitin yaradılmasına, avadanlıqların buraya gətirilməsinə böyük əmək sərf olunur.
Bizim üçün sevindirici məqamlardan biri də akademik avarçəkənimizin Paris-2024 Yay Olimpiya Oyunlarına lisenziya qazanmasıdır. Bu da federasiya rəhbərliyinin və məşçilər heyətinin əməyinin nəticəsidir ki, komandamız olimpiadada təmsil olunacaq", - deyə Elnur Məmmədov bildirib.
jpeg-1716534589.jpeg)
jpg-1720700530.jpg)
