Noyabrın 23-24-də Yunanıstanın Saloniki şəhərində yeniyetmə cüdoçular arasında Avropa Kuboku turniri keçirilib. 29 ölkədən 439 (295 oğlan, 144 qız) cüdoçunun mübarizə apardığı turnirdə Azərbaycan komandası oğlanların yarışında 20 idmançı ilə təmsil olunub.
Cüdoçularımız turniri 2 qızıl, 1 gümüş və 5 bürünc medalla başa vurublar.Komandamızın heyətində Zeyd Ələsgərov (-60 kq) və Sübhan Axundov (+90 kq) bütün rəqiblərinə qalib gələrək qızıl medala layiq görülüb.
Milli komandamızın digər üzvlərindən Fəxri Sahibzadə (-66 kq) gümüş, Anar Quliyev (-50 kq), Rüstəm Qasımzadə (-55 kq), Səid Şərifov (-73 kq), Amin Mehdiyev (-81 kq) və Tunar Fərzəliyev (+90 kq) isə bürünc medallara sahib çıxıblar.
Komandamız bu nəticə ilə ümumi komanda hesabında ikinci, oğlanların yarışında isə birinci yeri tutub.
