Fevralın 15-də Milli Gimnastika Arenasında keçirilən "Böyük Dəbilqə" turnirinin ikinci yarış günü Azərbaycan cüdoçuları üçün uğurla başa çatıb. İkinci yarış günündə cüdoçularımız 1 qızıl, 1 gümüş və 1 bürünc medal əldə ediblər.
-73 kq çəki dərəcəsində Rəşid Məmmədəliyev finalda dünya ikincisi Tatsuki İşihara ilə qarşılaşmalı olsa da, zədə səbəbindən tatamiyə çıxmadığı üçün yarışın gümüş medalla başa vurub. Bu çəkidə Vüsal Qələndərzadə bürünc medal uğrunda gənclər arasında dünya çempionu Ryuqa Tanaka ilə qarşılaşıb və yuko xalı ilə qələbə qazanaraq karyerasında ilk dəfə "Böyük Dəbilqə" turnirində medal əldə edib.
-81 kq çəki dərəcəsində Zelim Tçkayev qızıl medal uğrunda Kanada təmsilçisi Fransua Qotye Drapö ilə tatamiyə çıxıb. O, yuko xalı ilə qalib gələrək "Böyük Dəbilqə"lərdə dördüncü, Bakıda isə üçüncü dəfə qızıl medal qazanıb. Bu çəkidə digər cüdoçumuz Ömər Rəcəbli isə yarışın 5-ci pilləsində qərarlaşıb.
İki günün nəticəsinə görə Azərbaycan cüdoçuları ümumilikdə 1 qızıl, 1 gümüş və 3 bürünc medal əldə edərək komanda hesabında ikinci pilləyə yüksəliblər.
Qeyd edək ki, fevralın 16-dək davam edəcək "Böyük Dəbilqə" turnirində 36 ölkədən 258 (166 kişi, 92 qadın) idmançı mübarizə aparır.
jpeg-1739870327.jpeg)
