Gürcüstanda keçirilən Bakuriani-2025 Avropa Gənclər Qış Olimpiya Festivalı bir həftəlik gərgin yarışlardan sonra fevralın 16-da rəsmi olaraq başa çatıb. Avropa Olimpiya Komitələrinin (AOK) prezidenti Spiros Kapralos Bakurianidəki “Crystal” hotelində keçirilən bağlanış mərasimində 17-ci Avropa Gənclər Qış Olimpiya Festivalını bağlı elan edib. Mərasim zamanı AOK prezidenti Spiros Kapralos İtaliyanın qazandığı qarışıq kros estafetində festivalın son medallarını təqdim edib. Sonra Slovakiyadan Mikael Strakova və İtaliyadan Daniel Pedranzini Bakuriani-2025-də ən yaxşı qadın və kişi idmançılar üçün “Nodar Kumaritaşvili” mükafatı laureatlarını elan edib. Mükafat prezident Spiros Kapralos və Təşkilat Komitəsi tərəfindən Bakurianidə doğulub böyüyən gürcü xizəkçisinin 2010-cu il Vankuver Qış Olimpiya Oyunlarında məşq zamanı kədərli şəkildə vəfat etməsindən 15 il sonra təqdim edilib.

Spiros Kapralos çıxış edərkən qeyd edib: “Son yeddi gündə hər cəhətdən yüksək təşkilatçılıq baxımından fərqlənən Avropa Gənclər Qış Olimpiya Festivalında iştirak etməkdən şərəf duyduq. Möhtəşəm təşkilatçılıqdan könüllülərin mehribanlığına və azarkeşlərin coşğusuna qədər Gürcüstanda olmaq əsl zövq idi. Gənc idmançıların çıxışları müstəsna idi. Şübhə etmirəm ki, Bakuriani, Tbilisi və Batumidə Qış Olimpiya Oyunlarının gələcək ulduzlarının çıxışının şahidi olduq. Gürcüstan özünü qış idman növləri üçün müstəsna bir yer kimi tanıtdı. Bakurianidəki xüsusi həftəni əbədi xatırlayacağıq və indi Braşov-2027-ni həyəcanla gözləyirik”.

Spiros Kapralos Bakuriani-2025-i rəsmi olaraq bağlı elan etdikdən sonra AOK bayrağı Braşov Bələdiyyə başçısı və AOK 2027 Təşkilat Komitəsinin prezidenti George Skripkara, Braşov Bölgə Şurasının sədri Adrian Veshtea və Rumıniya Milli Olimpiya Komitəsinin prezidenti və AOK İcraiyyə Komitəsinin üzvü Mihai Kovaliunun müşayiəti ilə verilib.

Qeyd edək ki, fevralın 9-dan 16-dək davam edən festivalda 48 ölkədən 1000-ə yaxın idmançı 8 idman növündə: dağ xizəyi, biatlon, xizək yarışı, buz hokkeyi, snoubord, fiqurlu konkisürmə, fristayl və qısa yolda sürətli konkisürmə yarışlarında mübarizə aparıb. Ölkəmizi EYOF-2025-də fiqurlu konkisürmə idman növündə Leyli Axundov təmsil edib. İlk çıxışını qısa proqramda edən idmançımız 33.84 xalla 28-ci olub. Növbəti gün yenidən buz üzərinə çıxan fiqurlu konkisürənimiz bu dəfə sərbəst proqramda mübarizə aparıb.Batumidə keçirilən yarışda təmsilçimizin sərbəst proqramdakı çıxışı hakimlər tərəfindən 64.50 xalla qiymətləndirilib. O, bu nəticə ilə 26-cı yeri tutub.Beləliklə, idmançımız festivalı yekunda 31 iştirakçı arasında 28-ci pillədə başa vurub.