Beynəlxalq Güləş Günündə Şamaxıda media üçün seminar keçirilib

Güləş

Bugün, 12:16

Hər il mayın 23-ü Beynəlxalq Güləş Günü kimi qeyd edilir.

Olimpnews.az xəbər verir ki, bu münasibətlə Azərbaycan Güləş Federasiyası (AGF) tərəfindən Şamaxı şəhərində media nümayəndələri üçün seminar keçirib.

Təlim xarakterli görüşdə idman jurnalistləri, federasiya nümayəndələri və güləş ictimaiyyətinin üzvləri iştirak ediblər. Seminar zamanı güləş üzrə mövcud qaydalar, son yeniliklər, eləcə də beynəlxalq səviyyədə tətbiq edilən dəyişikliklər ətraflı şəkildə izah olunub.

Seminarda çıxış edən AGF-nin Hakimlər Komitəsinin sədri Asif Şirəliyev bildirib ki, qaydalara edilən son düzəlişlər yarışların tempini artırmaqla yanaşı, həm ədalətliliyi gücləndirir, həm də tamaşaçı marağını yüksəldir. O vurğulayıb ki, dəyişikliklərin əsas məqsədi yarışların gedişatını sürətləndirmək, subyektiv qərarların minimuma endirilməsi və idmançıların daha aktiv mübarizəyə təşviq olunmasıdır.

Seminar interaktiv formatda davam edib, jurnalistlərin ünvanladığı suallar ətraflı cavablandırılıb.

Seminar zamanı, həmçinin media nümayəndələri arasında quiz keçirilib və iştirakçılar fəallıqları ilə seçiliblər.