SOCAR minifutbol komandası III Dünya Korporativ Oyunlarının qalibi olub

Futbol

07.06.2026, 21:49

Azərbaycan Respublikası Gənclər və İdman Nazirliyi, AFFA və Azərbaycan Minifutbol Federasiyası tərəfindən təşkil olunan Ulu Öndər Heydər Əliyevin xatirəsinə həsr edilmiş dövlət qurumları arasında IV minifutbol turnirinin qalibi olmuş SOCAR minifutbol komandası, iyunun 5-7-də Mərakeş Krallığının Kasablanka şəhərində keçirilən III Dünya Korporativ Oyunlarında tarixi uğura imza atıb.

7 iyun tarixində keçirilən final görüşündə əzmkar oyunu ilə yadda qalan SOCAR komandası futbol ölkəsi kimi tanınan Mərakeşin ən böyük media qurumlarından birini təmsil edən “Le Matin” komandası üzərində 1:0 hesabı ilə möhtəşəm qələbə qazanıb.

Bu tarixi uğur sayəsində SOCAR bu idman növü üzrə Dünya Korporativ Oyunlarının qalibi adını qazanan ilk Azərbaycan komandası olmaqla yanaşı, turniri məğlubiyyətsiz başa vuraraq kuboka sahib çıxan ilk Azərbaycan komandası kimi də tarixə düşüb.

Qeyd etmək istərdik ki, SOCAR komandası finala gedən uğurlu yolda keçirdiyi bütün qarşılaşmaları qələbə ilə başa vurub. SOCAR 52 komandanın mübarizə apardığı turnirdə EM ENERGIE-ni 4:0, Crédit Agricole-u 6:3, CMS komandasını 5:2, Rostec-i 4:1, STELLANTIS KENITRA 1 komandasını 1:0, yarımfinalda isə NEWREST-i 3:1 hesabı ilə məğlub edib.