Arzu Qulamov: “Bizim filmlərin hər biri cəmiyyət üçün örnək olan insanların taleyini əks etdirir - MÜSAHİBƏ

İdman filmləri hər zaman geniş tamaşaçı auditoriyasına malik olub. Dünya şöhrətli idmançıları ekranda görən yüzlərlə tamaşaçı məhz bundan sonra bu sahəyə böyük həvəs göstərib. Bu gün idmanda şöhrətin zirvəsinə ucalan idmançılar məhz həmin filmlərə baxaraq, kumirləri kimi olmaq istəyiblər. Ölkəmizdə yaxın bir neçə il ərzində idman mövzusunda xeyli sənədli filmlər çəkilib. Bu sahədə öz bacarığını göstərən istedadlı rejissorlarımız da az deyil. Bu barədə geniş söhbət edib, məlumat almaq üçün Azərbaycan Kinematoqrafçılar İttifaqının üzvü, Avrasiya Teleradio Akademiyasının həqiqi üzvü, akademik Arzu Qulamovla redaksiyamızda görüşdük. İstedadlı və təcrübəli rejissor bizi maraqlandıran sualları cavablandırdı.  

- Arzu müəllim, uzun müddətdir Azərbaycan Milli Olimpiya Komitəsi ilə əməkdaşlıq edirsiniz. Bu müddət ərzində Olimpiya çempionlarımızın həyatından bəhs edən ekran əsərləri ərsəyə gətirmisiniz. Maraqlıdır ki, bu ideya haradan qaynaqlandı?   - Bu ideya 2008-ci ildə yarandı. Əməli işlər görmək üçün Milli Olimpiya Komitəsinin rəhbərliyinə Olimpiya çempionları barədə sənədli filmlərin istehsalı ilə bağlı təklif verdim. MOK-un vitse-prezidenti Çingiz Hüseynzadə bu təklifi məmnuniyyətlə qəbul etdi. İlk filmimiz Barselona-1992-də ölkəmizə şöhrət qazandıran cüdoçumuz Nazim Hüseynov haqqında “İlk qızıl” filmi oldu. Sonradan hər ildən bir digər Olimpiya çempionlarımız barəsində ekran əsərləri yaratdıq. 2019-cu ildə pandemiyadan qabaq iki legioner çempionumuz - Şərif Şərifov və Radik İsayevə həsr olunmuş sənədli film çəkdik. Ümumilikdə, 7 Olimpiya çempionumuzun hər birinin öz filmi oldu. Milli Olimpiya Komitəsinin 25 illiyinə həsr olunmuş tədbirlər çərçivəsində “Olimpiya odisseyası” adlı bir albom buraxdıq. Bir müəllif kimi etiraf edim ki, bu böyük zəhmət hesabına başa gəldi. Olimpiya çempionlarımızla bu sahədə işləmək böyük zövq verirdi. Biz bu filmlərdə Olimpiya çempionlarının zirvəyə gedən yolunu hər bir məqama qədər nəzərə aldıq. Bir sözlə, bizim filmlərin hər biri cəmiyyət üçün örnək olan insanların taleyini əks etdirir. Bu ekran əsərlərinin ərsəyə gəlməsi üçün ən azı 3-4 ay sərf etmişik. Nəticədə tamaşaçılarda bu filmlər barəsində müsbət rəy formalaşdıra bildik.  

 - Həmin filmləri tamaşaçılara necə nümayiş etdirdiniz?   - Qeyd edim ki, bizim Milli Olimpiya Komitəsi ilə iş birliyimiz çəkilişlərin təşkili və idmançılarla görüşməklə bitmədi. MOK-un, Gənclər və İdman Nazirliyinin dəstəyi ilə “Olimpiya odisseyası” adlı alboma daxil edilmiş filmlər Naxçıvandan paytaxt Bakıya qədər hər yerdə nümayiş olundu. Həmin filmlərin qəhrəmanları ilə tədbir iştirakçıları birbaşa təmasda oldular. Sevindirici haldır ki, hər bir görüş anşlaqla qarşılanırdı.

 

- “Olimpiya odisseyası” adlı alboma daxil edilmiş filmlərdən hər hansı biri beynəlxalq festivallara təqdim edilibmi?   - Əlbəttə. Nazim Hüseynov haqqında film 2015-ci ildə Bakıda keçirilən Beynəlxalq İdman Filmləri Festivalında milli filmlər nominasiyasında ikinci yerə sahib olub. Namiq Abdullayev haqqında çəkilən “Qızıl Sidney” filmi isə Avrasiya Teleradio Akademiyasının Rusiyada keçirdiyi beynəlxalq festivalına təqdim edilib. Həmin sənədli film münsiflər heyətinin xüsusi diplomuna layiq görülüb. Bu diplom, xüsusilə filmdə milli qəhrəman obrazının açılmasına görə mənə təqdim edilib. Buna görə çox fərəh hissi keçirdim.

  - Bildiyimizə görə, “Ərtoğrul” filminin sorağı daha mötəbər festivaldan gəlib.   - 2018-ci ildə Toğrul Əsgərov haqqında çəkilən “Ərtoğrul” filmi Beynəlxalq İdman Jurnalistləri Assosiasiyası tərəfindən film festivalına dəvət almışdı. Beynəlxalq Olimpiya Komitəsinin prezidentinin iştirakı ilə İsveçrənin Lozanna şəhərində keçirilən mükafatlandırma mərasimində hər qitədən olan filmlər yer alırdı. Avropa qitəsindən festivala təqdim olunan 10 ən yaxşı film sırasında “Ərtoğrul” filmi də yer tutmuşdu. Bu çox böyük nailiyyət idi.

 

- Növbəti festival barəsində oxucularımıza məlumat verərdiniz. Hazırlıq prosesi necə gedir?   - Bəli, biz ikinci festivala hazırlaşırıq. Bu işdə Milli Olimpiya Komitəsinin dəstəyinə çox arxalanırıq. Biz bu sahədə fəaliyyət göstərən media qurumlarına da dəvət göndərəcəyik. Yeri gəlmişkən, “Olimpiya dünyası” qəzeti media dəstəkçilərimizdən biri olacaq. Festivalı sosial şəbəkələrdə də təbliğ edəcəyik. Sevindirici haldır ki, budəfəki festivala biznes sahəsində fəaliyyət göstərən şirkətlər sponsor qismində deyil, tərəfdaş kimi qoşulacaqlar. Bizim üçün ən vacib məqam budur. Çünki tərəfdaşlıq yalnız maddi dəstəklə bitmir. Bizim bu sahədə, həm də mənəvi dəstəyə böyük ehtiyacımız var.  

- Dəqiq tarix müəyyənləşibmi?   - Yaxın günlərdə festivala start verməyi planlaşdırırıq. Bu barədə mətbuat konfransı təşkil edəcəyik. Həmin tədbirdə həm media, həm də biznes tərəfdaşlarımızı ictimaiyyətə təqdim edəcəyik. Bununla da festival öz işinə başlayacaq. Dekabr ayının ortalarında festivalın açılış mərasimini nəzərdə tutmuşuq. Hazırda bizim əlimizdə əvvəlki festivaldan 70-ə yaxın hazır material var. İlk festivalda ekran əsərlərini təqdim edən müəlliflər və qaliblər üçün yenidən fürsət yaratmaq istəyirik. Təbliğat üçün video-çarxlar hazırlanacaq. Bizi maraqlı bir açılış mərasimi gözləyir. Ola bilər ki, hər hansı bir filmi də bu tədbirdə nümayiş etdirək. Bir daha qeyd edim ki, nümayiş üçün film kolleksiyamız zəngindir. Hesab edirəm ki, biz uğurlu nəticəyə nail olacağıq.   Anar Əhmədov